23-декабрдиз Муаллимдин ва насигьатчидин йисан гьуьрметдай Ахцегь райондин Луткунрин хуьруьн цIийи мектебдин (директор — Заур Мегьамедов) залда «Кьиблепатан Дагъустандин умудар» лишандик кваз лап хъсандиз кIелзавай ученикрин слёт кьиле фена. И серенжем тухунин теклиф гайиди ахцегьви жумарт меценат Нариман Гъазалиев тир. Адан теклиф Ахцегь райондин администрацияди, РД-дин образованидин ва илимдин министерстводи, жегьилрин крарин рекьяй министерстводи хушдиз кьабулна ва саналди тешкилай мярекат республикадин дережадин кьетIен сувариз элкъвена.
Слетдиз Кьиблепатан Дагъустандин ирид райондин мектебрай 11-классра лап хъсандиз кIелзавай 85 аял атанвай.
Мярекат кьиле тухузвай жегьил шаир Владик Батманова кIватI хьанвайбур тебрикун патал гаф Ахцегь райондин администрациядин образованидин управленидин начальник, филологиядин илимрин кандидат Халидин Эльдароваз гана. Ада райондин кьил Абдул-Керим Палчаеван, РД-дин образованидин ва илимдин министр Ягья Бучаеван ва вичин патай хъсандиз кIелзавай аялрик руьгь кутазвай Нариман Гъазалиеваз ва и кардик пай кутур са жерге меценатриз сагърай лагьана.
– Гьуьрметлу аялар, образование, чирвал, илим инсандин уьмуьрда вири девирра важиблубур я. Йигиндиз виликди физвай чи девирда хъсан чирвилерихъ мадни еке метлеб ава, – къейдна Нариман Гъазалиева. – Зегьмет къачуна, хъсандиз кIелзавай куьн сагърай!
Гуьгъуьнлай сегьнедиз Ахцегь, Докъузпара, Кьурагь, Мегьарамдхуьруьн, СтIал Сулейманан, Рутул ва Хасавюрт районрин (Къурушрин хуьруьн) мектебра вири вадар аваз 11-классра кIелзавай аялар хкаж хьана. ТIварар кьунвай районрин образованидин управленийрин начальникар ва векилар тир Халидин Эльдарова, Руслан Исмаилова, Кьасум Абдулхаликьова, Айна Гьажиевади, Ямудин Таибова, Гьуьсейн Шихбабаева, Аким Лазимова аялрив РД-дин образованидин ва илимдин министерстводин патай разивилин чарар ва меценат Нариман Гъазалиева абурув пулдин пишкешар вахкана.
Пулдин пишкешриз виридалайни хъсан са шумуд муаллимни лайихлу хьана. Абурун арада Ахцегь райондай — Мая Гьажиевани Эрлияна Юсуфова, Докъузпара райондай — Суна Эюбова, Ахцегь райондин дишегьлийрин советдин председатель Таира Муспагьова ва Ахцегь райондин искусствойрин школадин директор Ширинбег Мусаев ва масабур авай.
Таира Муспагьовади тамамарай манийрини Алла Жалиловадин тIварунихъ галай искусствойрин школадин аялри авур кьуьлери виридан гуьгьуьлар шадарна.
Шабагьар вахкайдалай кьулухъ Халидин Эльдарова райондин кьиле авайбурун ва вири районэгьлийрин патай межлисдин тешкилатчийризни иштиракчийриз сагърай лагьана. Слётдин кьилин тешкилатчи Нариман Гъазалиевав ада РД-дин образованидин ва илимдин министр Ягья Бучаеван къул алай Разивилин чар вахкана.
Слетдин иштиракчийриз мярекатдин эхирдай суфраярни ачухнавай.
Дашдемир Шерифалиев
