«Лезги газетдиз» Кьурагь райондин администрациядин пресс-къуллугъди хабар гузвайвал, Кумух хуьре тренер Заир Рамазанован гъилик спортдал машгъул жезвай 9 жегьил каратистди Дербент шегьердин кIвенкIвечивал патал каратэ кекусинкайдай жегьил спортсменрин арада 16-17-мартдиз кьиле фейи акъажунра чпин алакьунар къалурна.
Кьиблепатан Дагъустанда спортдин и жуьре машгьур авунин мураддалди тешкилай акъажунра цIинин йисуз районрайни шегьеррай 250 каратистдикай ибарат 9 командади иштиракна.
Кьурагь райондин командадикай Дагълар Исмаилов гъалиб хьана. Асгьаб Исмаиловакайни Алибег Алибеговакай кьвед ва пуд лагьай призерар хьана. Абур талукь медалралди, грамотайралди, кубокралди ва пулдин пишкешралди къейдна. Къуй абурухъ гележегда мадни еке дережадин гъалибвилер хьурай!
«Лезги газет»
