ДАССР-дин 100 йисан юбилей къейдзавай йисуз Кьурагь райондин агьалийрив Санкт-Петербург шегьердай шад хабар агакьна. И шегьердин Елизаветинский азарханадин урологиядин отделенидин заведующийвиле кIвалахзавай кIириви Наир Сабирович Тагьирова 2021-йисан 21-январдиз медицинадин илимрин докторвилин диссертация агалкьунралди (тема: “Патогенетическая коррекция метаболических нарушений и андрогенного дефицита в лечении больных уролитиазом”) хвена.
Наир Тагьиров 1971-йисан 3-апрелдиз КIирийрин хуьре Сабир муаллимдин хизанда ирид лагьай аял яз дидедиз хьана. 1977-йисуз ам Агъул райондин центр тир Тпигърин юкьван школадиз фена ва 10-классдал кьван гьана кIелна. А вахтунда адан дах Сабир Тагьирова Агъул райондин халкьдин судьявиле кIвалахзавай. Гуьгъуьнлай ам хизанни галаз Кьурагь райондиз хтана ва ина судьявиле кIвалахиз гатIунна. Наира кIелунар Кьурагьрин 1-нумрадин юкьван школада давамарна. 1987-йисуз ада юкьван образованидин аттестат къачуна.
1988-1990-йисара Наира Советринни Китайдин сергьятдал СССР-дин КГБ-дин сергьятар хуьдай кьушунрин жергейра къуллугъна, хайи хуьруьз старшинадин чинда аваз хтана.
1993-йисуз ам Санкт-Петербург шегьердин педиатриядин академиядиз гьахьна ва 1998-йисуз анаг акьалтIарна. 1999-2001-йисара ада клиникадин ординатурада кIелна ва Санкт-Петербург шегьердин Елизаветинский больницада урологвиле кIвалахунилай зегьметдин рехъ башламишна. 2009-йисуз адакай медицинадин академиядин урологиядин кафедрадин доцент хьана. 2006-йисуз медицинадин илимрин кандидатвилин диссертация агалкьунралди хвена.
Чи ватанэгьли медицинадин рекьяй кхьенвай гзаф кьадар макъалайринни монографийрин автор я. Ада медицинадин рекьяй, кьилди къачуртIа, урологиядай Германияда, Францияда ва Финляндияда кьиле фейи международный конференцийра иштиракна.
Наир Сабировичахъ туькIвей хизан ава. Вичин уьмуьрдин юлдашдихъ галаз санал кьве хва тербияламишзава. ЧIехи хва медицинадин академиядин студент я. ГъвечIида школада кIелзава.
Тагьироврин сихилдикай рахайтIа, Наиран чIехи буба Магьсуд Касаевич Советрин вахтарин савадлу ксарикай сад тир. Ада СССР-дин КГБ-дин ва партиядин органра жавабдар къуллугъар авуна. КIирийрин хуьруьн жемятди адаз, Салигьован тIвар алай колхоздин председателвиле кIвалахдайла, еке гьуьрмет ийидай. Ада чIехидазни, гъвечIидазни къени меслятар гудай.
Наиран дах Сабир муаллимди яргъал йисара КIирийрин юкьван школада завучвиле, винидихъ къейднавайвал, Агъул ва Кьурагь районрин халкьдин судьявиле кIвалахна.
Наиран чIехи вах Гуьльнаради, психологиядин илимрин кандидат яз, алай вахтунда школада кIвалахзава.
ЧIехи стха Назира, медицинадин къуллугъдин отставкада авай полковник яз, Санкт-Петербург шегьерда Фрунзедин тIварунихъ галай военно-медицинский академияда курсантриз чирвилер гузва. Муькуь стха Надир Сабировича алай вахтунда КIирийрин юкьван спортшкола-интернатда директордин везифаяр тамамарзава.
Къазибег тIвар алай стхади намуслувилелди Россиядин МВД-дин Кьурагь районда авай отделда кIвалахна. Исятда отставкада авай капитанди жегьилрин арада тербиядин кIвалах тухузва. Са гафуналди, абур вири бегьер гъидай тарцин емишар я.
Гьакъисагъ зегьметдалди къачунвай чирвилерин нетижада Наир Тагьирова вичин тIвар Кьурагь дагъларин лап викIегь рухвайрин жергеда туна.
Кьурагь райондин ветеранрин ва агъсакъалрин советриз Тагьироврин хизандихъ, кьилди Наирахъ генани чIехи агалкьунар хьана кIанзава.
Фахрудин Мирзоев,
Кьурагь райондин ветеранрин ва
агъсакъалрин советрин председатель
