РД-дин къецепатан уьлквейриз метягь маса гуз куьмек гунин центр Дагъустандин суьрсет дуьньядин алишверишдин зурба майданрин онлайн-сектордиз акъудунин кIвалах тухузва, хабар гузва идарадин информациядин къуллугъди.
Кьилди къачуртIа, центрадин кьилевайбур са жерге карханайриз мугьман хьана, абуру лагьайтIа, чпихъ дуьньядин алишверишдин Amazon, Ebay, Etsy хьтин онлайн-майданриз экъечIдай фикир авайдакай лагьана.
Республикадин заргарвилин карханайрикай сад тир Каспийскда авай “Agra” ООО-дин генеральный директор Мурад Гьажиягьяева малумарайвал, къецепатан уьлквейриз метягь маса гуз куьмек гунин центрадин куьмекдалди республикада акъудзавай шейэр интернет-майданрилай маса уьлквейриз маса гунин кIвалахдик кьил кутунва.
“Чна экспортдиз куьмек гунин Центрадин мумкинвилерик умуд кутунва, ада и рекье чаз жедай куьмекар гузва”, — къейдна карханадин регьберди.
Центрадин руководителдин заместитель Арсен Межидова вичин нубатдай къейд авурвал, идалай вилик идаради Кеферпатан Америкадин базар авай мумкинвилерин жигьетдай ахтармишунин кIвалах кьиле тухванай ва онлайн-экспортдин къайдадикай менфят къачун патал и терефдихъ галай уьлквейриз килигун теклифнай.
Къейд ийин, 23-мартдиз РД-дин къецепатан уьлквейриз метягь маса гуз куьмек гунин центрадин руководитель Руслан Абаскъулиева Дербентдин администрацияда шегьердин карчийрихъ галазни гуьруьш кьиле тухвана. Мярекатда Дербентдин администрациядин экономикадин ва инвестицийрин управленидин начальник Садулла Кудаева, «Радиосигнал» ва Дербентдин газ квай чехиррин заводрин, коньякрин комбинатдин, гьакIни шегьердин бизнес-жемиятдин векилри иштиракна.
Карчийрихъ галаз суьгьбет башламишдалди вилик Руслан Абаскъулиева центради 2020-йисуз тухвай кIвалахдин нетижаяр кьадай бязи рекъемар раижна. ИкI, малум хьайивал, алатай йисуз идарадин куьмекдалди къецепатан уьлквейриз санлай къачур къимет 2,3 миллион доллардиз барабар тир метягь маса ганва. ГьакIни ада Туьркиядиз, Ирандиз бизнес-миссияр тешкилайдакай ва Германиядай, Къазахстандай, ОАЭ-дай, мад са жерге государствойрай делегацияр кьабулайдакай хабар гана.
“Чун куь карханайриз къецепатан уьлквейрай мумкин тир муьштерияр жагъуриз, маса уьлквейрин базарар ахтармишиз, алишверишдин теклифар, сертификатар гьазуриз, метягьдин лишанар регистрация ийиз куьмек гуз гьазур я”, — лагьана Руслан Абаскъулиева.
Гуьруьшдин иштиракчийри акъудзавай суьрсет маса уьлквейриз агакьарунин карда авай мумкинвилериз, тайин тир государствойрихъ галаз алишвериш ийидай ихтияр гузвай документар ва сертификатар къачунин кьетIенвилериз иллаки итиж авуна.
Мярекатдин иштиракчияр эхирдай икьрар хьайивал, Центрадин векилар чкадин карханайриз мад сеферда кьилди-кьилди мугьман жеда ва абурухъ авай мумкинвилер мукьуфдивди ахтармишда.
Амина Муслимова
