Алай йисан 1-паюна Ахцегь райондин МФЦ-диз (Многофункциональный центр) гьар жуьре къуллугърин патахъай ва меслят-куьмек кIанз 15 агъзурдалай артух агьалияр атана. Абурукай 13 500 касдиз гьукуматдин ва муниципальный къуллугъар авуна. Асул гьисабдай районэгьлияр чилерин месэлайрихъ галаз алакъалу яз Росреестрдинни Кадастровый палатадин рекьяй куьмекар кIанз къвезва ва абурув гьахьтин куьмекар агакьарни ийизва. ИкI, 2017-йисан январдилай июлдалди райондин “Зи документар” центрада 11 100-далай артух ксариз чилерин гьакъиндай къуллугъар авуна.
Алай вахтунда МФЦ-дин кIвалахда важиблу чка агьалияр госкъуллугърин сад тир порталда (ЕСИА) регистрация авуни кьазва, гьикI хьи, РД-дин Кьил Рамазан Абдулатипова и месэла вахтунда кьиле тухвана бегьемарун республикадин вири муниципалитетринни идарайрин вилик кьетIивилелди эцигнава.
ЕСИА къурулушда регистрация хьанвай касдивай неинки муниципальный къуллугърин порталдикай менфят къачуз жеда, гьакI адан вилик Гьукуматдин официальный пара маса къуллугърин гьакъиндай гегьенш мумкинвилер ачух жезва. Месела, адан куьмекдалди, гьатта МФЦ-дизни тефена, кIвале компьютердихъ ацукьна, коммунальный гьакъияр, кредитрин взносар гуз, загранпаспорт къачуз, автомобиль регистрация ийиз, духтурдин кьилив фин патал учир кьаз ва «онлайн» къайдада пара маса крар асантдиз кьиле тухудай мумкинвал ава. Идалайни гъейри, гележегда гьар жуьре арзаяр кхьинни асант я: са сеферда и къурулушдин хсуси кабинетда гьатнавай рекъемар (персональные данные) амукьзава кьван, лазим атанмазни акъудиз жеда.
Къейдин, гъилевай йисан ругуд вацра райондин МФЦ-да регистрация авунвай 4217 касди электронный Гьукуматдин мумкинвилерикай — ресурсрикай агалкьунралди менфят къачузва. Гекъигун патал, шаз ина анжах 3691 кас регистрация авуна. ЦIи и кIвалах мадни активламишнава. Теклифзава: госкъуллугърин ЕСИА порталдикай менфят къачу, куь вахт кьенят жеда.
Дашдемир Шерифалиев
