9-июндиз Ахцегь райадминистрациядин залда райондин агъсакъалрин Советдин заседание хьана. Ам ачухай муниципалитетдин кьил Осман Абдулкеримова  РД-дин агъсакъалрин Советдин председателдин заместитель, РФ-дин лайихлу энергетик Эседуллагь Агьмедов тебрикна ва сифте гаф мугьмандиз гана.

— Гьуьрметлу  районэгьлияр, заз квехъ галаз гуьруьшмиш жез кIанз гзаф вахт тир. Тахминан 30 йис я уьлкведа ва чи республикада агъсакъалрин советар тешкилна. ­Абурун везифа республикадин, районрин кьиле акъвазнавай гьукумдарриз кьиметлу  меслятралди куьмекун, абурун меслятчи хьун я. Исятда РД-дин Кьил Рамазан Абдулатипова тежрибалу агъса­къалрин мумкинвилериз кьетIен дикъет гузва ва адан теклифдалди республикада авуна кIанзавай кIвалахрин махсус программа туькIуьрнава. Гьахьтин програм­маяр районрани, хуьрерани хьун ва абурал амал авун герек я. Эхи­римжи вахтунда Ахцегь районда гьалар  хъсанвилихъ  дегиш  жезвайди республикадин руководст­водиз аквазва, — къейд­на мугьманди.

Ахпа Эседуллагь Исакьовича республикадин агъсакъалрин Советдин кIвалахдикай суьгьбетна.

— Тежрибалу агъсакъалривай чаз кIанзавай кьилин кIвалах акьалтзавай несилдиз дуьз тербия гун я. Куь куьмекдалди чаз, эвелимжи нубатда, Ахцегьрал абур гъиз, ам шегьердиз ухшамишиз, куь теклифдалди Ахцегьрин кьере, цIийиз къир цанвай шегьредин патав 2-3 гектардин майданда алай аямдин истемишунрив кьадай ял ядай гуьзел багъ туькIуьриз кIанзава. Итижлу маса проектарни ава, — лагьана О.Абдулкеримова.

Рахай агъсакъалри (РД-дин ­ла­йихлу муаллим Жумрид Дагъларова, РД-дин культурадин ла­йихлу работник, писатель Абдулрашид Рашидова, Зегьметдин баркаллувилин 3-дережадин ордендин сагьиб, механизатор Тажидин Сардарова  ва  масабуру) райондин руководст­водиз чпелай алакьдай куьмек гун хиве кьуна. Кьилди къачуртIа, абур эквер мукьвал-мукьвал хкатзавайдакай, электросетра гужлувал зайиф тирдакай, Калукрин хуьре дигидай цин патахъай авай четинвилерикай, “Мегьарамдхуьр-Ахцегь” шегьре ремонт  авунин чарасузвиликай, Ахцегьрин бязи куьчеяр гегьеншарун ва Ленинан куьче автотранспортдикай кьезиларун патал элкъвена дагъдин кIаникай тухванвай Герейханован тIварунихъ галай куьче туь­кIуьр хъувун лазим тирдакай ра­хана.

Эседуллагь Агьмедова ва Осман Абдулкеримова агъсакъалрин теклифрихъ дикъетдивди яб акална, мумкинвилериз килигна, абур кьилиз акъудун хиве кьуна.

Дашдемир Шерифалиев