Суддин вилик жаваб гуда

Къайтагъ районда тади гьалда гел жагъурдай серенжемар тухудайла, полициядин къуллугъчийри отделдиз хкай Мажалисдин 39 йиса авай агьалидивай, ахтармишайла, 6,57 гр марихуана жагъана. Си­лис­ ту­хузвай къуллугъчийри шак физ­вай­ди маса тахсиркарвилер авуникни шерик яни, тушни ахтармишзава.­

Наркотик гваз кьунвайдалай Россиядин Федерациядин УК-дин 228-статьядин 1-паюнин бинедаллаз (наркотикар законсуздаказ къачунай ва хуьнай) уголовный дело къарагъарнава.

Шак физвайди, гьелбетда, суддин вилик акъвазда.

Эгер тахсиркарвал тестикь хьайи­­тIа, адаз пуд йисал къведалди­ кар гуда.

Дишегьлидизни гьалал жедач

 МВД-дин наркотикрал алвер авунал гуьзчивалдай къуллугъчийри Махачкъаладин Г.Омарован тIва­рунихъ галай куьчеда авай са кIва­ле­р­ин патавай полициядин отделдиз хкай 29 йиса авай жегьил дишегьлидивай -меркездин агьалидивай — инсандин бейнидиз гзаф таъсирдай трамадол  (8 таблетка)  жа­гъа­на.

Шак физвайдалай, Россиядин Федерациядин Уголовный Кодексдин 234-статьядин 2-паюнал асаслу яз (гзаф таъсирдай шейэралди алвер авунай), уголовный дело къарагъарнава.

Закондалди и дишегьлидизни 2 йисал къведалди кар къвезва.

Маса гузвай чкадал кьуна

Махачкъалада тади гьалда гел жагъурдай серенжемар тухудайла, полициядин къуллугъчийриз Юсупован тIварунихъ галай куьчеда са кIва­ле­рин патав 38 йис хьанвай ше­гьерэгьлиди малум тушир муьштеридиз бейнидиз гзаф таъсирдай затI тир трамал (3,96 гр) маса гудайла аку­на ва ам, гьа чкадал кьуна, ОВД-диз хкана. И жегьил итимдилайни РФ-дин УК-дин 234-статьядин бине­даллаз уголовный дело къара­гъар­нава. Судди ам, 3 йисав агакьна кар гуналди, азадвиликай магьрум авун мумкин я.

Ракьара гьатна

 Каспийскда угърияр пайда хьанвайди аннамишай полицейскийри тади гьалда гел жагъурдай серенжемар кьабулиз башламишна. Абурун шак 30 йиса авай са дишегьлидал фена. Абур ягъалмиш хьанач. Угъ­риди, куьлегар хкягъуналди, са шегьерэгьлидин кIваляй 38000 манатдин къимет авай шейэр чуьнуьхнавай.

Кьабулай серенжемар себеб яз полицейскийриз угъри полициядин отделдиз хкидай мумкинвал хьана. Дишегьлиди вичин тахсир хиве кьуна. Чуьнуьхай шейэр вахчунва. Силисчийри угъри гьа ихьтин маса тахсиркарвилрик шерик яни-тушни  ахтармишзава.

Шак физвайдалай РФ-дин УК-дин 158-статьядин 3-паюнин (чуьнуьхунар авун) бинедаллаз уголовный дело къарагъарнава. Ам суддин вилик акъвазда.Адаз 6 йисав агакьна кар къвезва.

РД-дин МВД-дин пресс-къуллугъдин материалрай.

Гьазурайди — Алаудин Гьамидов