СтIал Сулейманан райондин кьил Саид Темирханова Украинада кьиле физвай махсус серенжемда иштиракзавай Раул Гьажибалаевахъ галаз мукьвара гуьруьш кьиле тухвана.
Раул ЦIийи Мамрачрин хуьряй я. Ада серенжемда сад лагьай йикъалай иштиракзава ва вичел ихтибарнавай везифаяр чешнелудаказ тамамарзава. Отпускдин вахтунда ам хайи хуьруьз хтана, вичин хизандал, диде-бубадал кьил чIугуна.
Райондин кьилихъ галаз кьиле фейи гуьруьшда Раула чкадин агьалияр Урусатдин армиядин аскеррив эгечIзавай къайдадикай, гузвай куьмекрикай ихтилатна. Адан фикирдалди, серенжемдин кьилин метлеб Урусатдин милли хатасузвал таъминарун ва дяведин гьерекатар кьиле физвай зонада яшамиш жезвай ислягь агьалияр сагъ-саламатдиз хуьн я. Отпуск куьтягь хьайидалай кьулухъ ам вичи къуллугъзавай кьушунрин частуниз хъфида ва командованиди гузвай тапшуругъар кьилиз акъудда.
Саид Темирханова, адан сад лагьай заместитель Лацис Оружева, Герейханован хуьруьн администрациядин кьил Руслан Алдырова, Ватандин къуллугъда акъвазна, викIегьвал, къастунал кIевивал къалурунай Р.Гьажибалаеваз сагърай лагьана ва адахъ чандин сагъвал, мадни гзаф къуватар хьун алхишна. Муниципалитетдин кьили, гуьруьшдин сергьятра аваз, махсус серенжемдин иштиракчидивай адахъ гьялна кIанзавай гьихьтин месэлаяр аватIа жузуна ва райондин администрация Ватандин сергьятар хуьзвайбурун хизанриз вири рекьерай куьмекар гуз гьазур тирди къейдна.
«Лезги газет»
