2018-йисуз Дагъустандин бюджетдай ципицIар гьялзавайбур патал куьмек яз тахминан 100 миллион манат чара ийида, хабар гузва РД-дин хуьруьн майишатдин ва недай суьрсетдин министерстводин пресс-къуллугъди.
“Емишар ва ципицIар кIватIунин жигьетдай республикадин игьтияжар 97 процентдин таъмин я, фикирзава, мукьвал тир йисара чун жува-жув тамамдаказ таъминарунал элячIда. Хуьруьн майишатдин суьрсет гьасилзавайбур гьевесламишунин, кьилди къачуртIа кIватIнавай ципицIар гьялунин кардиз субсидияр чара авуналди куьмек гунин макьсаддалди Дагъустан Республикадин бюджетда 2018-йис патал 100 миллион манат фикирда кьунва”, — малумарна РД-дин хуьруьн майишатдин ва недай суьрсетдин министрдин везифаяр вахтуналди тамамарзавай Керимхан Абасова.
РикIел хкин, Россиядин мулкунал кIватIзавай вири ципицIрин саки пудай са пай Дагъустандал гьалтзава. 2017-йисуз республикада ракъинин кагьрабайрин садрани тахьай кьадар бегьер вахчуна – тахминан 170 агъзур тонн, им адалай вилик квай йисандалай 19,6 агъзур тонндин артух кьадар я. Адакай 106 агъзур тонн ципицIар (2016-йисандалай 20 агъзур тонндин гзаф) гьялун патал карханайриз рекье туна.
Дагъустандин уьзуьмлухри санлай къачурла 25,2 агъзур гектардин чил кьазва, абурукай 18,2 агъзур гектардай бегьер кIватIзава.
«Лезги Газет»
