Дагъустандин Кьил Сергей Меликова республикадин агьалийриз Курскдин областдиз куьмек гун патал вацран мажибдин са йикъан гьакъи «Все вместе» фондуниз чара авуниз эвер гана.
«Заз дагъустанвийрин арада Курскдин областда арадал атанвай гьаларив къайгъусузвилелди эгечIзавайбур авачирди чизва. И йикъара чун вири руьгьдин жигьетдай абурун патав гва. Гзафбуруз абуруз куьмекиз кIанзава, амма гьикI ийидатIа чизвач. Гьавиляй, гьуьрметлу дагъустанвияр, за ашкъи авай гьар садаз вичин вацран мажибдин са йикъан гьакъи «Все вместе» фондуниз чара авун теклифзава. И такьатар, са тахсирни квачиз, душманрин зулумрик акатнавай Курскдин областда авай чи дустарив агакьда», — кхьенва С.Меликова вичин телеграм-каналда.
Мукьвара «Инсан» фондуни Курскдин областдиз са шумуд тонндив агакьна недай-хъвадай суьрсет агакьарнава. Ихьтин куьмек идалай кьулухъни рекье твадайвал я. Дагъустанда алай вахтунда Курскдин областдай атанвай аялрини ял язава.
«Лезги газет»
