Республикадин Гьукуматдин Председатель Абдулмуслим Абдулмуслимова 13-августдиз Дагъустандин дагълух районриз тIебиатдин татугай гьалари гайи зиянар алудуниз талукьарнавай совещание кьиле тухвана.
РикIел хкин хьи, 26-28-июлдиз гужлу селлери Рутул, Кьурагь, Агъул, СтIал Сулейманан ва ЧIарода районра лап муракаб гьалар арадал гъана.
Дагъустандин премьерди хабар гайивал, къвайи марфари ЦIумада райондин Хварши вацIа яд са шумуд сеферда артухарна ва муьгъ тухвана. Идакди 5 хуьруьхъ галаз автотранспортдин алакъа амач. Гайи зиянар тайинарун патал ЦIумада райондиз талукь ведомствойрин пешекарар ракъурда.
«Июлдин эхирра галаз-галаз къати марфар къуникди хейлин районра вацIар алахьна. Идакди рекьер, муькъвер тухвана, электроперадачайрин линийриз зиян гана. Бязи чкайра кIвалер ва маса дараматарни цик акатунин къурхулувал арадал атана.
Чун талукь идарайрин векиларни галаз 7-августдиз Агъул ва Рутул районриз фена. Алай вахтунда анра селлери гайи зиянар алудуниз талукь серенжемар давамарзава. Иллаки агьалияр электроэнергиядалди таъминаруниз, рекьер автомашинар фидайвал туькIуьр хъувуниз гзаф фикир гана кIанда.
Татугай гьалар и йикъара ЦIумада райондани арадал атана. Заз къе квевай хатадик акатнавай чкаяр гуьнгуьна хтун патал кьабулзавай серенжемрикай ва селлерик хуьрер, рекьер акат тавун патал вучзаватIа, гьадакай малуматар агакьарна кIанзава. Чкадал МЧС-дин къуллугъчийри кIвалахзава. Муниципалитетдиз маса ведомствойрин пешекарарни рекье твада. Хьайи зиянар тайинарда. Рекьер туькIуьр хъийидай, хуьрер, чилер селлерикай хуьдай серенжемар кьабулда»,- лагьана Абдулмуслимова.
Малумарайвал, Рутул райондин рекьер туькIуьр хъувун патал 30 млн манатдив агакьна такьатар герек къведа. Республикадин рекьерин къуллугъчийри чIур хьанвай чкаяр гуьнгуьна хтун патал кIвалахзава. 15-сентябрдалди вири кIвалахар акьалтIарун лазим я. Алай вахтунда селлери зиян ганвай вири рекьер автотранспорт фидай гьалдиз гъанва.
Дагъустандин эцигунрин, архитектурадин ва ЖКХ-дин министерстводи чкадин администрациядихъ галаз санал ийидай кIвалахар, абуруз акъатзавай такьатрин кьадарар тайинарнава ва Шиназ, Михрек, Цудик, Жилихуьр, Агъа КIатрух хуьрерин рекьер ва цин линияр къайдадиз хкида.
Рутулрин хуьре электропередачайрин цавай фенвай линияр мягькемар хъийизва. Абуру кIвалахни ийизва. Эгер гележегда вацIу бинеяр тухвайтIа, дестек аватайтIа, «Дагэнергоди» ракьунни бетондинди гьазурнава ва ам вацIувай яргъа авай чкада къяда.
Агъул районда вири хуьрерихъ галаз автотранспортдин алакъа ава ва гуьнгуьна хтунин кIвалахарни давамарзава. ВацIа яд гзаф хьуникди Хилих хуьруьн 9 кIвал цик акатна.
Мярекатдал Абдулмуслим Абдулмуслимова РД-дин тIебиатдин ресурсрин ва экологиядин министерстводиз вацIарин къерехар мягькемарна кIанзавай районрин карта туькIуьрунин тапшуругъ гана. Марфар гзаф къуникди Ахцегь, Рутул, Кьурагь, Агъул, СтIал Сулейманан ва ЧIарода районрин вацIара яд гзаф хьана. Ахтармишунар авурла, малум хьана хьи, ци тади гузвай 11 участокда герек кIвалахар тухвана кIанзава.
Абдулмуслим Абдулмуслимова РД-дин тIебиатдин ресурсрин ва экологиядин министерстводал вацIарин къерехар мягькемарунин мураддалди федеральный ва республикадин госпрограммайра иштиракун патал герек материалар гьазурун ва актар туькIуьрун тапшурмишна. Неинки татугай гьалар авай районра, гьакI вири республикада ахтармишунар кьиле тухун, талукь карта туькIуьрун тапшурмишна. И месэладикай малумат РД-дин Кьил Сергей Меликовал агакьарда, къейднавай крариз федеральный бюджетдай лазим кьадар финансар чара ийидайвал.
Мярекатдин вахтунда Дагъустандин премьерди МЧС-дин, энергетикадин, тIебиатдин ресурсрин ва экологиядин, эцигунрин, архитектурадин ва ЖКХ-дин министерствойрин кьилерин малуматрихъ яб акална.
Региондин премьерди Черкес-Кутанда зирзибилди цIай кьунин месэлани кудна. Ада РД-дин тIебиатдин ресурсрин ва экологиядин министерстводин кьил Ратмир Расуловавай 15 йикъан муддатда зирзибил вегьезвай чка федеральный проектдик кутуниз талукь месэла гьикI гьялзаватIа, гьадакай малумат гун истемишна.
Хийир Эмиров
