14-августдиз Махачкъалада арадал атай бедбахтвилин дуьшуьшдин нетижада зиянар хьайибуруз куьмек гун патал, «Tooba» приложенидикай менфят къачуна, 72 агъзур касди, садакьа яз, пулдин такьатар чара авунва. Идакай РД-дин Кьилин пресс-къуллугъди хабар гузва.
«Tooba» приложение арадал гъайи Рамазан Межидован гафаралди, инсанри 5-10-100 манатдилай 300 агъзур манатдал кьван пул ганва. Абурукай 30 процент дагъустанвияр я, амайбур — Урусатдин жуьреба-жуьре регионринни къецепатан уьлквейрин агьалияр.
Къейд ийин хьи, бедбахтвилин дуьшуьшдин нетижада зиянар хьайибуруз куьмек гун патал мергьяматлу фондарини пулдин такьатар кIватIзава. Мисал яз, пуд йикъан къене «Все вместе» фондуни 40 миллион манат пул кIватIна. И фондуниз такьатар чара авурбурун арада карчияр, депутатар, чиновникар, жергедин агьалияр ава. Виридалайни пара такьатар гайи карханайрин арада «Денеб», «Иммидстрой», «Аптека 36.6», «Завод минеральных вод «Рычал-Су», «Полоса», «Экотуркомплекс Главрыба» ООО-яр, «ДКК» АО ва «ДЗИВ» ОАО ава.
Чи мухбир
