22-августдиз РД-дин Кьил Сергей Меликован регьбервилик кваз республикада къайда-низам тун таъминаруниз талукь координационный совещание кьиле фена. Анал чимивилинни энергетикадин комплексда рехъ гузвай тахсиркарвилерин ва маса нагьакьан крарин вилик пад кьуниз талукь яз кьабулна кIанзавай серенжемар веревирдна.
Мярекат ачухай Сергей Меликов эхиримжи варцара республика кIеве гьатай месэлайрал акъвазна. «Квез чизвани, зун уьлкведин Президентдиз чина кьиле физвай крарикай хабар гуниз мажбур хьана. Алай гьафтеда гьукумдин федеральный органри чи месэлайриз талукь яз совещание кьиле тухун лазим я».
Гьа са вахтунда эхиримжи йикъара Дагъустанда арадал атай гьалариз талукь яз тайин тир серенжемар кьабулун ва къуллугърал алай бязи ксар жавабдарвилиз чIугун лазим я, — къейдна республикадин Кьили.
РД-дин МВД-дин министрдин везифаяр тамамарзавай Сергей Власова хабар гана хьи, алай вахтунда къайдаяр хуьдай органар газ ва электроэнергия чуьнуьхзавай дуьшуьшар дуьздал акъудунал, АЗС-ар ва хъиткьиндай шейэр авай складар ахтармишунал машгъул я. Республикадин са шумуд муниципалитетда законсуздаказ майнинг-фермайрин кIвалах тешкилнавай ксар жавабдарвилиз чIугвазва.
Ресурсар чуьнуьхун энергетикадин компанийрин куьмекни галаз кьиле тухузвайдал фикир желб авуналди, Сергей Меликова къайдаяр хуьдай органриз абурун крарай кьил акъудун истемишна. РикIел хкин хьи, чимивилинни энергетикадин комплексда къайда тун таъминарунин месэладал региондин прокуратурани машгъул я.
Хийир Эмиров
