Ахцегь районда дяведин рекьяй къуллугъиз
фенвайбурун хизанриз гьар вацра 10 агъзур манат пул чара ийида
Ахцегь районда тамам тушир мобилизациядиз талукь комиссиядин председатель Осман Абдулкеримова мукьвара муниципалитетдин администрацияда кьиле фейи заседанидал къейд авурвал, Ватандин ЧIехи дяведилай инихъ чи уьлкве сифте яз тухуниз мажбур хьайи и жавабдар месэлада сифте йикъара, гьелбетда, гъалатIарни кимивилер хьана. Алай вахтунда абур туькIуьр хъувунва ва пландин серенжемар лазим тирвал тамамарзава. Дяведин рекьяй къуллугъ авуниз Ахцегь райондай са шумуд десте рекье тунва ва и кIвалах давам жезва. “И жигьетдай тафаватлу жезвай Ахцегьрин, Хуьруьгрин, КьакIарин, Ялахърин хуьрерин кьилериз баркалла. Гьа са вахтунда гьар жуьре багьнайралди Калукрин, Луткунрин, Хинерин, Гутумрин, Фиярин хуьрера мобилизациядин кIвалах гьелелиг зайиф я.
Ватан хуьн итимдин эвелимжи буржи, бубайрилай атанвай пак веси тирди рикIелай алудна виже къведач. Итимар фронтдиз фенвай хизанрин къайгъу чIугун, игьтияж авайбуруз вири жуьредин куьмекар гун, армиядиз тухузвайбур алукIдай махсус пек-парталдалди таъминарун чна чи хивез къачунва. И мураддалди гьар са хуьре тамам тушир мобилизациядин сергьятра аваз эвер ганвайбурун махсус сиягьар туькIуьрзава.
Дяведин рекьяй къуллугъ ийиз фенвайбур авай гьар са хизандиз вацра 10 агъзур манат пул гудай меслят хьанва. Чи баркаллу карчияр-меценатар тир Жамал Пашаева райондай тамам тушир мобилизациядик квайбуруз дяведин 500 къат партални бронежилет маса къачузва, Абдулселим Палчаева вичин патай 1 миллион манат пул чара авунва. Дяведа иштиракзавай аскеррин хизанриз куьмекун патал районда махсус фонд тешкилдай (чи гьар са хуьре адан жавабдар къуллугъчияр тайинарда) ниятни ава…”, — лагьана Ахцегь райондин кьил Осман Абдулкеримова.
Дашдемир Шерифалиев
