Дагъустандин кьилевайбуруз къведай йисуз “Газпром — аялриз” проектдин сергьятра аваз республикада яшайишдин 15 объект эцигиз кIанзава. И месэладай мукьвара Москвада кьиле фейи гуьруьшдал РД-дин Кьил Сергей Меликовни “Газпром” ПАО-дин правленидин председатель Алексей Миллер икьрар хьана, — хабар гузва региондин Кьилин пресс-къуллугъди.
Сергей Меликован гафаралди, республика газдин хилев жавабдарвилелди эгечIунин нетижада Дагъустандихъ “Газпромдихъ” галаз амадагвилин алакъаяр вилик тухудай мумкинвал хьана. “Идалай кьулухъни абур мягькем жедайдак за умудар кутазва”, — къейдна республикадин Кьили.
РД-дин энергетикадин ва тарифрин министерстводин пресс-къуллугъди хабар гайивал, “Газпром” компанияди 2025-йисалди Дагъустанда метандин 5 АЗС (автозаправочная станция) эцигдайвал я. РикIел хкин, и месэладиз талукь икьрар компаниядини республикадин Гьукуматди Санкт-Петербургда международный дережада аваз кьиле фейи газдин форумда кутIуннай.
«Лезги газет»
