Кайванийриз меслятар
Келем чна гегьеншдиз ишлемишзава: дулмадиз, шурпадиз (борщ) ва икI мад. Амма адахъ кулунин (метелка) гьунарни, яни келемдихъ руфуна ратарал алкIанвай герек авачир амукьаяр, чиркер михьдай алакьун авайди виридаз чизвач. Инал ихтилат асул гьисабдай келемдин салатрикай физва. Чир хьана кIанда хьи, салатар гьазурдайла, келемдин тIебии дад амукьдайвал авуниз фикир гун, яни ам дад хъсанардай туьнт шейэралди (истивут, серг ва мсб.) басмиш тийин.
Келем помидоррихъ, афнийрихъ, газаррихъ, салан маса майвайрихъ галаз кьада, амма салатдиз 4-5-далай артух куьткуьнна виже къведач. ЧукIулдалди куьлуь авунвай келем, кьел вегьена, тIушунна кIандач — лап хъсан мижедин саки 35% квахьда (яни витамин С, минеральный кьелер…).
Келемдикай са шумуд жуьредин дадлу салатар гьазуриз жеда.
- Куьлуь авунвай келемдал ракьай янавай газар, цуру ич, афнидин кIусар, чичIек алава хъийида. КIешниш, шивит куьткуьнда. Винелай семечкадин чIем ва я къаймах иличда.
- Келем, сельдерей, петрушка, шивитар, куьлуь авуна какадарна, эферар, са тIуруна авай семечкадин чIем, къацу чичIекар, цуру ич алава хъийида.
- Куьлуь авунвай келемни помидорар, атирдин ни галай хъчар (месела, пурнияр) какадарда. Са-са тIуруна авай семечкадин чIем, цуру миже алава хъийида.
- Са тарелкада авай куьлуь авунвай келемрик ракьай янавай кьве газар, петрушка, сельдерей какадарда. Винелай са тIимил семечкадин чIем ва ичерин сирке иличда.
- Келемни газарар, куьлуь авуна, миже кумукьдайвал тIушунда. Адаз чичIекни серг куьткуьнда, яру истивут алава хъийида. Вири чинидин къапуна туна, винелай залан шей эцигда. Недайла, са тIимил ичерин сирке алава хъийида.
- Келем, чугъундур, турп ракьай яда, винел къаймах вегьеда. Са суткада хуьрек тIуьн тавуна, гьа ихьтин салат ишлемишайтIа, ада руфун, ратар кулуни хьиз михьда.
Гьазурайди — Ш.Шихмурадов
