22-сентябрдиз къанун-къайда хуьдай органрин къуллугъчийри, къуллугъдин векилвилерин сергьятрай экъечIунай шак финалди, Дагъустан Республикадин Кьилин ва Гьукуматдин Администрациядин Руководителдин заместитель Исмаил Эфендиев кьуна. Идан гьакъиндай “Лезги газетдиз” региондин къанун-къайда хуьдай органра авай чешмеди хабар гана.
“Ам къе кьуна, РФ-дин УК-дин “Къуллугъдин векилвилерин сергьятрай экъечIун” статьядай адалай уголовный дело къарагъарнава. Адан кабинетда ва кIвале тайин серенжемар, гьа гьисабдай къекъуьнин серенжемар, кьиле тухузва”, — лагьана агентстводин векилди.
Ада баян хгайвал, дело вичин сергьятра аваз республикадин виликан вице-премьер Рамазан Алиев кьур хьтин агьвалатдихъ галаз алакъалу яз къарагъарнава. 23-сентябрдиз Махачкъаладин Советский райондин судди къуллугъдин векилвилерин сергьятрай экъечIунай шак фена кьунвай Дагъустан Республикадин Кьилин ва Гьукуматдин Администрациядин Руководителдин заместитель Исмаил Эфендиев 10 йикъан муддатда дустагънава. Идан гьакъиндай “Лезги газетдиз” суддин пресс-къуллугъди хабар гана.
“Махачкъаладин Советский райондин судди, вилик пад кьунин серенжем яз, Исмаил Эфендиев 10 йикъан муддатда — кутазвай тахсир малумардалди къаравул кьилел алаз хуьн къарардиз къачунва”, — лагьана суддин векилди.
Адан гафаралди, тахсир кутазвайди малумарай дуьшуьшда ам къаравул кьилел алаз хуьнин вахт кьве вацрав агакьда.
Дагъустандин Кьил Владимир Васильева гьяд юкъуз къуллугъдин векилвилерин сергьятрай экъечIунай шак фена кьунвай Дагъустандин Кьилин ва Гьукуматдин Администрациядин Руководителдин заместитель Исмаил Эфендиев къуллугъдикай азадна. Идан гьакъиндай “Лезги газетдиз” Дагъустандин Кьилин ва Гьукуматдин Администрациядин информационный политикадин рекьяй управленидай хабар гана.
“Исмаил Эфендиев Дагъустандин Кьилин ва Гьукуматдин Администрациядин Руководителдин заместителдин къуллугъдикай азаднава. Идан гьакъиндай Указдал къе республикадин Кьили къул чIугуна”, — лагьана управленидин векилди.
Чи мухбир
