Халкьдин дипломатия — кардик
Эхиримжи са шумуд йисуз Дагъустандин халкьари Садвилин югъ еке гьевесдивди, ашкъидивди къейдзава. Бубайрин девирра пара хъсан адетдиз элкъвей хванахвавили алай девирда цlийи уьмуьр кутазва. Йисалай-суз жуьреба-жуьре миллетрин гзаф векилри, гадайри ва рушари чпин кьисметар садзава, хизанар арадал гъизва. Идан гьакъиндай чи хуьрера пайда жезвай цIийи сусари шагьидвалзава.
Алатай вацра “ЛГ”-ди (№ 34) аварвийринни лезгийрин арада дуствиликай, кьакьан Ботлих районда Сулейман-Стальский райондин векилар гьикI кьабулнайтIа, гьадакай кхьенай. Мукьвара, 21-23- сентябрдин йикъара, Ботлих райондин векилар, кьиле МВД-дин запасда авай полковник Камил Мегьамедов аваз, чна лезги чилел кьабулна.
Мугьманрин арада МЧС-дин Ботлих райондин управленидин къуллугъчи Абдулгьамид Аминов, Ботлих хуьруьн администрациядин виликан кьил, гила КЦСОН-дин директор Мегьамедрасул Османов ва социальный къуллугъдин пешекар Агьмаднаби Мегьамедов авай.
Мугьманар макьави, МВД-дин къенепатан крарин къуллугъдин запасда авай полковник Магьсуб Магьмудова ва ЦIийи Макьарин агьалийри хушвилелди кьабулна. Хванахвавилин алакъаяр гегьеншарун, абур районрин дережадиз хкажун патал зегьмет чIугвазвай М.Магьмудова ва Цийи Макьарин хуьруьн школадин руководстводи багьа мугьманрихъ галаз мукьувай таниш хьунин гуьруьш тешкилна. Шад мярекатда школадин директор Ж.Абасовади, шаир ва журналист Ш.Шабатова, райондин ТВ-дин къуллугъчийри, школадин 11-классрин аялри ва муаллимри иштиракна. Инал кьве патан векилрини чи халкьарин арада авай дуствиликай, ам мадни мягькемаруникай лагьана, тарихдин деринриз эвичIна, чун сад ийизвай вакъиаяр рикIел хкана.
КIватI хьанвайбуру Ш.Шабатован Дагъларин уьлкведин халкьарин дуствилиз талукь суьгьбет еке хушвилелди кьабулна. Мярекатдал чи халкьдин дипломатиядиз талукь, Кьасумхуьруьн ТВ-ди туькIуьрнавай лентни сифте яз къалурна.
Гуьруьшдин эхирдай аварвийрин векил Мегьамедрасул Османова чеб ЦIийи Макьарин муаллимрин ва школьникрин десте кьабулиз гьазур тирдакай ва и кар патал вири шартIар авайдакай малумарна. Дуствилин гуьруьшдин эхирдай цIийи дустари рикIел аламукьдай шикилар яна.
Гуьгъуьнлай, мугьманриз лезги чилин, Сулейман-Стальский, Хив районрин тIебиатдин гуьрчег пипIер къалурна. Ахпа аварви дустар лезги са шумуд хизанда хьана, чи адетрихъ, къилихрихъ ва тIуьнрихъ галаз мукьувай таниш хьана.
Арадал атанвай хванахвавилин гьерекатдик гележегда маса хуьрер, жемятар ва диндин къуллугъчияр экечIдайдак умуд кутазва.
Мизамудин Магьмудов
