Дагъустандин Кьил Владимир Васильева республикадин экономикадин ва мулкар вилик тухунин рекьяй министрдин сад лагьай заместитель Гьажи Султанов вахтуналди региондин Минэкономикадин кьилин везифаяр тамамарзавайди яз тайинарна. Идан гьакъиндай 14-майдиз региондин кьилин сайтда малумарна, ТАСС-ди хабар гана.
Гь.Султанова республикадин экономикадин ва мулкар вилик тухунин рекьяй министрдин везифаяр апрелдин эхирдилай — 2018-йисан февралдиз и министерстводин кьиле хьайи Осман Хасбулатов кьурдалай гуьгъуьниз тамамарна.
“Дагъустан Республикадин экономикадин ва мулкар вилик тухунин рекьяй министрдин сад лагьай заместитель Султанов Гьажи Русланович “Дагъустан Республикадин экономикадин ва мулкар вилик тухунин рекьяй министрдин везифаяр вахтуналди тамамарзавайди яз тайинарин”, — лугьузва региондин Кьилин Указда.
2001-2006-йисара Гь.Султанова, Дагъустандин финансрин министерстводин Новолак районда авай управленидин руководитель яз, 2014-йисалай Дагъустандин экономикадин ва мулкар вилик тухунин рекьяй министрдин заместителвиле кIвалахна. Икьван чIавалди ам РД-дин Президентдин, Дагъустандин Кьилин ва Гьукуматдин Администрацияда контрольно-финансрин управленида жуьреба-жуьре къуллугърал хьана. Ам “Зи Дагъустан” кадрийрин конкурсдин гъалибчи я.
* * *
Махачкъаладин Кировский райондин судди Дагъустандин экономикадин ва мулкар вилик тухунин рекьяй министр Осман Хасбулатов 2-майдиз кьве вацра кьунва. Адал, республикадин гзаф везифайрин центраяр тадаракламишдайла, государстводин контрактар тамамардайла, 20 миллион манатдилай гзаф чуьнуьхунай шак физва.
Осман Хасбулатов 30-апрелдиз кьуна, адалай РФ-дин УК-дин 159-статьядин 4 лагьай паюнин (“Лутувал”) сергьятра аваз уголовный дело къарагъарнава. Ада Дагъустандин экономикадин ва мулкар вилик тухунин рекьяй министрвилин къуллугъ 2018-йисан февралдилай тамамарзавай, Гьукуматдин цIийи состав туькIуьрдай ноябрдин вацра ада вичин къуллугъ хвена. 2013-2018-йисара О.Хасбулатова агьалийриз государстводин ва муниципальный къуллугъардай Дагъустан Республикада авай гзаф везифайрин центрадиз руководство гана.
Россиядин Федеральный антимонопольный къуллугъдин (УФАС) Дагъустандин управлениди и вахтунда, МФЦ-дин руководитель яз, федеральный законодательство чIурунай 1,5 млн. манатдин кьадарда аваз ам жерме авунин 31 къарар акъуднай. О.Хасбулатован арзадалди Махачкъаладин районрин судди и жермеяр акъвазарнай, гуьгъуьнлай Дагъустандин Верховный судди УФАС-дин гьерекатар законлубур яз гьисабнай. Амма О.Хасбулатов административный жавабдарвилиз чIугунин вахтар алатнай ва, и кардиз килигна, районрин судрин къарарар къуватда тунай.
«Лезги газет»
