Алай йисуз Советрин Союздин Игит Эсед Бабастанович Салигьов дидедиз хьайидалай инихъ 100 йис тамам жезва. Дирибаш кIиривидин кьегьалвилерикай газетдин алатай нумрадиз акъатай “Ватанди игитрал дамахзава” макъалада лагьанва. Гьавиляй адан женгинин рекьикай мад сеферда кхьин хъувунин лазимвал авач. Чаз Лезгистандин кьегьал хцин экуь къаматдиз Урусатда, Псковдин областдин чилел ийизвай гьуьрметдикай куьрелди лугьуз кIанзава.
Псковдин областдин Новосокольнический райондин Заболотье хуьруьз гьахьзавай къекъуьндал “Чпин чанар къурбандна, Заболотье хуьр азад хъувур Советрин Союздин Игит Э.Б.Салигьоваз ва адан женгинин юлдашриз” кхьинар атIанвай гуьмбет гьалтзава. Ам 1960-йисара уьтквем ватанэгьлидин экуь къамат эбеди яз рикIера хуьнин макьсаддалди дагъустанвийри эцигнай. Къейд ийин хьи, Эсед Салигьова вичин уьмуьрдин эхиримжи декьикьаяр гьа и хуьруьн накьварал игитвилелди акъуднай.
Майор Салигьов ва адан женгинин юлдашар Заболотье хуьруьвай са тIимил яргъа Новосокольнический райондин Слободка хуьруьн сергьятра стхавилин сурара кучукнава. И сурара лезги игитдиз гуьмбетни эцигнава. Кьакьанвилел 2 метр алай монументдал “1919-йисуз дидедиз хьайи ва 1944-йисан 16-январдиз Ватан патал кьегьалвилелди телеф хьайи Советрин Союздин Игит, майор Салигьов Эсед Бабастанович инал кучукнава” кхьинар атIанва.
Игитдин кьве гуьмбетдихъни хъсан гелкъуьн тешкилнава. Гъалибвилин юкъуз чкадин агьалияр гуьмбетрал физва, анрал цуьквер эцигзава, Игитдин экуь къамат рикIера хуьзва. ЦIи лагьайтIа, Э.Салигьован Заболотьевада авай гуьмбетдал адан хуьруьнвияр — Ватандин ЧIехи дяведин ветеран Магьсуд Тагьирован птулар — Гьажибег ва Сократ Тагьировар фенвай. Алай вахтунда абур кьведни Псковдин ФСИН-дин (Федеральная служба исполнения наказаний) академиядин курсантар я. Шад жедай кар ам я хьи, игитдин несилар халис ватанпересар яз чIехи жезва, абурук бубайрин баркаллу крари руьгь кутазва.
Мегьамед Ибрагьимов
