И мукьвара Дагъустандин Гьукуматдин вице-премьер Абдулмуслим Абдулмуслимова Ахцегь, Мегьарамдхуьруьн, Сулейман-Стальский районрин кьилерихъ — Осман Абдулкеримовахъ, Фарид Агьмедовахъ, Нариман Абдулмуталибовахъ ва РД-дин “Дагсельхозстрой” ГКУ-дин директор Мегьамед Юсуповахъ галаз “Хуьрерин мулкар комплекснидаказ вилик тухун” РФ-дин госпрограммадин серенжемдин сергьятра аваз хуьрера эцигун пландик кутазвай яшайишдин объектрин проектринни сметадин документар гьазурунин гьал веревирдна. Идан гьакъиндай РД-дин Администрациядин Кьилин ва Гьукуматдин пресс-къуллугъди хабар гана.
РД-дин Гьукуматдин Председателдин заместителди а кардин патахъай рикIел хкана хьи, Россиядин хуьруьн майишатдин министерствода хуьрерин мулкар комплекснидаказ вилик тухудай госпрограмма кардик акатиз башламишнава. И программадин сергьятра аваз хуьрерин чкайра яшайишдин саки вири жуьрейрин объектар — школаяр, аялрин бахчаяр, культурадин кIвалер, газофикациядин, целди таъминардай, канализациядин объектар, фельдшервилинни акушервилин пунктар, спортдин комплексар эцигун планламишзава. Идалайни гъейри, госпрограммадин сергьятра аваз хуьруьн чкайрин къурулуш хъсанарун патал чарасуз тир школадин автобусар, санай-масаниз фидай поликлиникаяр ва маса тадаракар къачуз жеда. 2020-йисуз Россиядин минсельхоздин реестрдик кьуд район кутунва, винидихъ тIварар кьунвай объектар эцигун патал 1,5 миллиард манат ахъайда.
Районрин кьилери и кардихъ галаз алакъалу яз чпи ийизвай кIвалахрикай галай-галайвал лагьана ва Россиядин минсельхоздин федеральный реестрдик кутунвай и объектар хуьз гьазур тирдан гьакъиндай лагьана.
Месэлаяр веревирд ийидай вахтунда Абдулмуслим Абдулмуслимова райондин кьилериз Россиядин минсельхоздин 2020-йисан реестрдик кутадай проектринни сметадин документар туькIуьрунин кIвалахар1-сентябрдалди куьтягьун ва гьазур проектар гележегда абур Россиядин минсельхоздив агакьарун патал РД-дин “Дагсельхозстрой” ГКУ-диз вугун меслятна.
«Лезги газет»
