21-августдиз Дагъустан Республикадин хуьруьн майишатдин ва недай суьрсетдин министерстводин пешекарар Мегьарамдхуьруьн райондин мулкунал “Премиум” ООО-дин инвестицийрин проект уьмуьрдиз кечирмишзавай гьалдихъ галаз таниш хьана. Идан гьакъиндай “Лезги газетдиз” РД-дин хуьруьн майишатдин ва недай суьрсетдин министерстводин пресс-къуллугъди хабар гана.
Проектдал асаслу яз, Ярагъ-Къазмайрин хуьре са сменада 500 лапаг кьасабдай къуват авай пункт эцигда. Проектдин къимет 60 миллион манатдилай гзаф я, и пулуникай 30 миллион манат технологиядин тадаракар ва махсус автотранспортдин такьатар маса къачун патал харжда. Объект бюджетдинбур тушир чешмеяр желб авуналди финансламишда.
Кьасабхана эцигунин кIвалах 2019-йисан февралдиз башламишнай, ам алай йисан эхирра ишлемишиз вахкудайвал я.
Къейд ийин хьи, гьайванар кьасабдай цIийи чкаяр абур хуьзвай зонайра кардик кутунин патахъай Дагъустандин Кьил Владимир Васильева республикадин Халкьдин Собранидиз ракъурзавай гьар йисан Чарче лагьанай.
И проект уьмуьрдиз кечирмишуни лапагрин як гьялунин шартIар хъсанардай ва ам экспортдиз ракъурун гзафардай мумкинвал гуда.
Винидихъ тIвар кьур министерстводин хаммал гьялдай ва потребкооперация вилик тухунин рекьяй отделдин начальник Агъабала Агъабалаева къейд авурвал, алай вахтунда ведомство “Премиум” ООО-диз, тайин макьсаддин “2019-2020-йисара РД-да малдарвилин продукция гьялунин кIвалах вилик тухун” программадин сергьятра аваз, технологиядин тадаракар ва махсус автомобилрин транспорт маса къачун патал авур харжийрин са пай вахкунин субсидияр гунин месэладиз килигда.
«Лезги газет»
