Республикадин Кьил Владимир Васильеван теклифдалди кардик кутур “Зи Дагъустан — зи рекьер” проектдин сергьятра аваз, Кьурагь районда кьве куьчеда ремонтдин кIвалахар кьиле тухвана акьалтIарнава. Идакай муниципалитетдин администрациядин пресс-къуллугъди хабар гузва.
Кьилди къачуртIа, КIирийрин хуьре генерал М.Къагьриманован тIварунихъ галай куьчеда (умуми майданди 2730 кв.м. тешкилзава) къир цанва. Къе-пака тротуарарни туьхкIуьрда ва куьчеда лазим тир лишанарни (рекьерин гьерекатдиз талукь) эцигна акьалтIарда. И кIвалахар кьилиз акъудун патал кутIуннавай икьрардин къимет 1955050 манатдиз барабар я.
Мад са куьче КьепIиррин хуьре ремонтнава. Ф.Асланован тIварунихъ галай куьчеда (ремонтдин кIвалахар кьиле тухузвай умуми майдан — 3125 кв.м.) 230 метрда къир цанва.
Ремонтдинни эцигунрин кIвалахар “Элит строй групп” карханади тамамарзава.Проект кьилиз акъудзавай гьал райондин кьил З.Азизова гуьзчивилик кутунва.
Чи мухбир
