Мегьарамдхуьруьн районда хуьрерин куьчеяр аваданламишунин ва ремонт авунин кIвалахар давам жезва. Идакай «Лезги газетдиз» муниципалитетдин администрациядин пресс-къуллугъди хабар гана.
Къейдзавайвал, райондин руководстводи рекьер аваданламишуниз кьетIен фикир гузва ва гьар йисуз райондин рекьерин фондунин такьатрихъ хуьрерин къенепатан куьчейра къир цазва.
Мукьвара Бут-Къазмайрин хуьруьн агьалийрик шадвал кутадай вакъиа кьиле фена. Ина райондин бюджетдин такьатрихъ са шумуд куьчеда (санлай 730 метрда) къир цана акьалтIарнава. Виликдай, иллаки марфар къвайила, ремонтдин кIвалахар кьиле тухванвай куьчейрай фидайла, чкадин агьалияр жуьреба-жуьре манийвилерал гьалтзавай. Гила лагьайтIа, къир цанвай куьчедай, гьихьтин гьава хьайитIани, регьятдиз физ жезва.
Хуьруьн жемятди куьчеяр аваданламишуниз фикир гунай райондин руководстводиз сагърай лугьузва. Муниципалитетдин администрациядин пресс-къуллугъдин векилди алава хъувурвал, агьалийрин яшайишдин шартIар хъсанарунихъ элкъуьрнавай кIвалахар тамамарун инлай кьулухъни давам жеда.
Чи мухбир
