СтIал Сулейманан райондин гуьне патан хуьрерин арада Уллу-Гъетягъар екебурукай сад я. Анай неинки районда, гьакIни вири Дагъустанда, чи чIехи Ватан тир Россиядиз машгьур хьайи инсанар акъатна.
Виликдай чи хуьр вири мулкар тирвал гзаф булахар авай чка тир. Алай вахтунда, тIебиатдин гьалар дегиш хьунихъ галаз алакъалу яз, ина саки вири булахар кьуранва. Чи чIехи бубайри лугьудайвал, хуьруьн абур сифтени-сифте булах я (ахпа ким, мектеб, мискIин…).
Уллу-Гъетягъиз гьахьайла, сифте ГацIад булах гьалтзавай. Хуьруьн атIа кьиле Къубат булах авай. Гьайиф хьи, и булахра яд амачиз саки 10 йис кьван я.
Адет яз, булахрал чи дидеяр, вахар, юлдашар, сусар яд гъиз фидай. Анрал хуьре вуч хабарар аватIа чир жедай. Идалайни гъейри, мехъерар авур пуд лагьай юкъуз цIийи сусар, сандухдин паярни гваз, булахдал акъуддай адет авай. Анал сусан тIварцIихъ чими, хуш алхишар-дуьаяр ийидай. Чи магьледа авай Къубатан булахдал ихьтин мярекатар техжез гзаф йисар алатнава.
Лагьана кIанда, чи хуьруьнви, мирес («чквайрин» тухумдай) Агъаталаев Низамудина Къубатан булахдал чан хкун патал еке зегьмет чIугуна. Ада хсуси харжидихъ саки 1 км мензилдиз къанав яна, турбаяр кутуна, яд хкана. Аферин касдиз. Идалайни гъейри, адахъ и магьледин куьчеда вичин такьатрихъ 500 метрдин мензилда къир цадай фикирни ава.
Низамудиназ неинки са чи хуьруьн, гьакIни булахдилай яд къачузвай маса хуьрерин агьалийрини алхишарзава. Къуй адан берекатар мадни артух хьурай!
Ямудин Бабаев
