Межидова Гуьзел Алиевна 1955-йи­сан 14-мартдиз СтIал Сулейманан район­дин Куьрхуьрел лежбердин хизанда ди­де­диз хьана. 1971-йисуз ада 8-класс акьал­тIарна ва Дербентдин педучилищедик экечI­на. 1975-йисуз ам Курхуьруьн­  М. Рагьи­мован тIварцIихъ галай юкьван мектебда старший пионервожатыйвиле кIвалахал акъвазна. КIвалахдивай къерех тахьана, 1976-йисуз Дагъустандин госуниверситетдин филологиядин факультетдин лезги ва урус чIаларин муаллимар гьазурдай отделенидик экечIна, 1982-йисуз анаг агалкьунривди акьалтIарна.      

Пионервожатыйвиле зегьмет чIугур 15 йисан къене кIвалахдал ашукь тир Гуьзел­ Межидовади мектебда кIелзавай аялрихъ галаз хейлин кIвалахар тухвана. Адан регьбервилик хьайи В. Терешковадин тIвар­цIихъ галай пионеррин дружина гьамиша вилик жергейра авай. Аялрал рикI алай Гуьзел Алиевна гьамиша абурун юкьва жедай, аялризни ам гзаф кIандай. Гагь ам аялар галаз тама жикIияр кIватIиз жедай, гагь — куьгьне ракьар кIватIиз, гагь совхоздиз емишар кIватIунин карда куьмек гуз, гагь «Зарница» къугъунра иштиракиз, гагь аялар галаз парадра — гьамиша кIвенкIве.

Акьалтзавай несилдиз тербия гунин, чир­вилер хкажунин ва тешкиллувилин кIва­лахра къалурай агалкьунрай 1975-йисуз ам Коммунистрин партиядин жергейриз кьабулна. Гьакъисагъ зегьметдай адаз республикадин, райондин комсомолдин комитетрин ва Дагъустандин профсоюзрин облкомитетдин патай гьуьрметдин грамотаяр гана.

Гьа и йисара Гуьзел Межидовадин  зегьметдин нетижаяр ва жемиятдин уьмуьрда тухвай кIвалахар чешне яз къалурзавай са шумуд макъала «Дагъустандин комсомолец», «Коммунизмдин гатфар», «Куьредин хабарар» газетриз акъатна.

1976-йисуз ам ВЛКСМ ЦК-дин «1976-йисан зарбачи» ва 1985-йисуз Вирисоюздин пионеррин тешкилатдин «Пионеррихъ галаз активнидаказ кIвалахунай» лишанриз лайихлу хьана.

Гуьзел Алиевна са шумудра Дагъустандин пионеррин тешкилатдин слетриз, конференцийриз делегатвиле хкяна.  1989-йисуз Дагъустандин областдин ВЛКСМ-дин комитетдин эхиримжи (40 лагьай) конференциядал адан зегьмет грамота ва пишкеш гуналди къейдна.

1991- йисуз ада сифте урус чIаланни литературадин, кьве йисалай лезги чIаланни литературадин муаллимвиле кIвалахиз га­тIунна. Ачух тарсар, хуьруьн тарихдиз ва лезги шаирринни писателрин юбилейриз талукьарнавай хейлин мярекатар тешкилна­. Абур чкадин телеканалдайни къалурнай.

Хейлин аялри лезги чIалай ва литературадай гьам райондин, гьам республикадин олимпиадайра ва конкурсра кIвенкIвечи чкаяр кьуна: 2024-йисуз Элина Пирмегьамедова лезги литературадай райондин олимпиадада  кIвенкIвечи чкадиз, Гуьльмира Меликова лезги чIалан олимпиададай ва «Шарвили» эпосдай са чукI хъсандиз кIелунай 2-чкайриз, Анжела Рустамова хсуси шиир­ кIелунай республикадин литературадин кон­курсда 1-чкадиз, 2025-йисуз Алия Межи­дова Вирироссиядин «Ученик года-2025» ва жуван культурадикай урус чIалал ва урус культурадикай лезги чIалал хъсандиз кхьинин Вирироссиядин сочиненийрин региондин этаприн конкурсра 1-чкайриз лайихлу хьана.

Г. Межидова 1995-йисуз РФ-дин  «Халкь­дин просвещенидин отличник» лишан­диз, 2005-йисуз «Дагъустан Республикадин­ ла­йихлу муаллим» лагьай гьуьрметдин тIвар­цIиз лайихлу хьана.

КIвалахда аквадай хьтин агалкьунар авай муаллим, зегьметдин ветеран Г. Межидова райондин дидед чIаланни литературадин муаллимрин ассоциациядин председателвиле хкяна.

И йисара ада Россиядин Федерациядин­ «Лап хъсан муаллим» конкурсда иштиракна —  ам РФ-дин Президентдин грантдиз ва Гьуьрметдин грамотадиз лайихлу хьана. Кар чидайди ва кIвалах ийиз алакьдайди вилик фида лагьайвал, ада 2010-йисуз райондин «Дидед чIалан хъсан муаллим» лагьай конкурсда иштиракна ва 1-чка кьуна, конкурсдин республикадин паюниз акъатна. Махачкъаладай ам райондиз республикадин «Дидед чIалан лап хъсан муаллим» лагьай тIвар къачуна хтана.

Г. Межидова лезги чIаланни литерату­радин, эдебдин тербия гунин ва милли адет­рал амал авунин месэлайриз талукьарна тухвай гзаф конференцийрин иштиракчи я. Конференцийрин секцийрин кIвалахда ада са шумудра мастер-классар гана. ИкI, 2011-йисуз республикада школьникарни студентар патал тешкилай «Дидед чIал ва литература алай девирда» конференциядал авур маналу докладдай ам шабагьдиз ва разивилин чарчиз лайихлу хьана.

Гуьзел муаллимдин къадалай гзаф док­ладар ктабриз ва брошюрайриз акъатнава. Ингье абурукай са шумуд: «Мектебда­ «Шарвили» эпос чирун», «Лезги чIал урус чIалахъ галаз сад хьиз чирун», «Ата-бу­байрилай ирс яз атай сувар», «Лезги литература чирдай вахтунда ватанпересвилинни гражданвилин тербия гун» ва масабур. Ам «5 ва 6-классар патал тестер», «СтIал Су­лейман — халкьдин шаир» пособийрин, «Лезги чIал чирунин ва вилик тухунин цIийи рекьер» разработкадин, ва маса макъалайрин, Куьре Меликакай кхьенвай ктабдин автор я.

Г. Межидовади тарс гайи гзаф аялрикай дидед чIаланни литературадин муаллимар хьанва.

Гуьзел Алиевнади 1976-2010-йисара Кур­хуьруьн 163-округдин сечкидин комиссия­дин членвиле ва секретарвиле, тежриба­ авай пешекар яз, 5 йисуз мектебда педсоветдин секретарвиле, 6 йисуз школадин профкомдин председателвиле кIвалахна. Адаз аялрин, диде-бубайрин, муаллимрин ва хуьруьн агьалийрин патай еке гьуьрмет ава.

КIвалахдив яратмишдай тегьерда эгечI­завай устаддихъ шиирар кхьидай, махар туькIуьрдай бажарагъни ава.

Гуьзел муаллимдин хизан, аялар, хтулар хайи чIалаз вафалубур я, дидед чIа­лахъ галаз алакъалу вири крарин иштиракчиярни я, куьмекчиярни.

Гуьзел Алиевнадин тежрибадикай дидед чIаланни литературадин гзаф муаллимри менфят къачузва. Вичел алай Гуьзел тIварцIиз вафалувал хуьз алахъзавайди хьиз, муаллимди гьар са карни гуьзелдиз кьилиз акъудзава.

Вахъ чандин сагъвал, хизанда хушбахтвал, кIвалахда мадни агалкьунар хьун чи мурад я, гьуьрметлу Гуьзел Алиевна.

Къагьриман  Ибрагьимов