Хиве кьуна
Избербашдин агьалидал автомобилрин ягъ чуьнуьхунай шак физва. Къейдзавайвал, алай йисан 1-декабрдиз шегьердин полициядин отделдиз автосервисда товароведвиле кIвалахзавай дишегьлиди малумат агакьарна. Идакай РД-дин МВД-дин пресс-къуллугъди хабар гузва.
Автосервисдин къуллугъчидин гафаралди, алай йисан октябрдилай инихъ малум тушир кас складдиз гьахьна ва анай автомобилрин жуьреба-жуьре ягъар тухвана. Санлай къачурла, чуьнуьхнавай ягъарин умуми къимет 539340 манат я.
Полициядин къуллугъчийри Избербаш шегьердин 27 йисан яшда авай агьали дуьздал акъудна ва отделдиз гъана. Жегьилди вичи авур кар хиве кьуна. Ихтилат авурвал, ада къейднавай автосервисда водителвиле кIвалахзавай. Метягьар авай чкадиз фидай мумкинвал авай жегьилди тIимил-тIимил канистраяр авай ящикар дашмишна ва Каспийск шегьердин улакьрин са туьквендиз маса хгана. Чуьнуьхай метягьдин са кьадар пай адавай вахчунва ва иесидив ахгакьарнава.
И делилдай суд-силис авун патал материал кIватIнава.
Улакь чуьнуьхна
Махачкъаладин полициядин къуллугъчийри чкадин агьалидив угърийри чуьнуьхай автомобиль вахкана. Шегьердин Кировский отделдиз арза гваз 30 йисан яшда авай жегьил атана. Ада Акушинский проспектда авай са кIвалерин гьаятда акъвазарнавай вичин “ВАЗ-21074” автомобиль (30 агъзур манатдин къимет авай) чуьнуьхнавайдакай хабар гана.
Полициядин къуллугъчийри машин чуьнуьхунай шак физвай Махачкъаладин 4 агьали тайинарна ва отделдиз хкана. Абур 16, 18, 19 ва 21 йисан яшара авай жегьилар я.
Абуру хиве кьурвал, ракIарар куьлегдалди агал тавунвай машин акурла, абурун кьилиз ам чуьнуьхдай фикир атана. Худдик кутуна, гьална абуру ам. Гуьгъуьнлай са гьинал ятIа акъвазарна ва чеб кIвалериз хъфена. Пакадин юкъуз абуру мад машин гьал хъувун кьетIна, амма и сеферда абурувай кеф чIугваз хьанач — полициядин къуллугъчийри акъвазарна. Жегьилривай машиндиз талукь документар къалуриз хьанач.
И делилдай РФ-дин УК-дин 166-статьядин 1-паюнай (ихтиярар авачиз чарадан улакьдин иесивал авун) уголовный дело къарагъарнава.
«Лезги газет»
