И мукьвара Дагъустандин ктабрин издательстводи машгьур писатель, алим ва общественный деятель Къурбан Халикьович Акимован “Сабля-Кемер” (“Къилинж-Къемер”) урус чIалаз таржума авунвай роман чапнава. Ана XV-асирда Миграгъ хуьре яшамиш хьайи, вичин шиирар теснифай лезги халкьдин кьегьал руш Къемеракай ихтилат физва. Ктаб акъатуникай газетда хабар ганвайтIани, са куьруь къейд зазни хъийиз кIанзава.
Лезгистандин тарихда вакъиайралди ацIай девирда хайи ватан кIан хьун, ам душманрикай хуьнин карда ялавлу ватанпересвал къалурун, гьахьтин рекье жегьил чанарни гьайиф татун — романдин кьилин мана-метлеб я. Им, зи фикирдалди, вири аямра чи литературадин кар алай месэлайрикай сад я. Романдин кьилин игитар тир Султалидинни Къемеран жегьил хизандин чешнедалди эсерда гьакI михьи муьгьуьббат, вафалувал, халкьдин къени адетрин артухвал, намус-гъейрат хуьн, зегьметдал рикI хьун виливай кьатIуз жедайвал къалурнава.
Вад виш йис идалай вилик чи халкь хвейи, машгьурай хъсан адетрал, хесетрал амал авун къени, гележегдани герек я.
Роман акьалтзавай жегьил несилриз (жегьил хизанриз) герек эсер — насигьатдин чешне хьанва. Ам кIелун, уьмуьрда менфят къачун гьар садаз меслят къалурзава.
Алаудин Саидов
