Куь ихтиярар
РД-дин “Дагълух мулкар экономикадинни яшайишдин жигьетдай вилик тухун” госпрограммада иштиракун патал МФЦ-дин идарада арза вугуз жеда. Республикадин МФЦ-дин кьилин идарадай чаз гайи делилралди, талукь тир арза вугун патал нубатда акъвазун ва я виликамаз зенгер авун лазим жезвач. Арзаяр кьабулунин муддат алай йисан 12-октябрдалди давам жеда.
Къейд ийин, тIвар кьунвай госпрограмма РД-дин экономикадин ва мулкар вилик тухунин министерстводи кьилиз акъудзава. Кьилди къачуртIа, пулдин такьатар ихьтин хилер вилик тухуниз ахъайда:
- недай суьрсетар, хъвадай затIар гьасилун патал герек тадаракар къачуниз;
- гъвечIи теплицаяр туькIуьруниз;
- суьрсетар хуьдай логистикадин центраяр эцигуниз;
- промышленностдин суьрсетар гьасилунин рекьяй кархана арадал гъуниз ва я цIийи хъувуниз;
- куьмекдин майишатри лазим техника къачуниз.
Ибурулайни гъейри, РД-дин дагълух мулкарин яшайишдинни экономикадин гьалариз къимет гунин, экономикадин жигьетдай анрихъ авай мумкинвилер тайинарунин рекьяй илимдинни ахтармишунрин кIвалах кьиле тухунай махсус грант чара авунва.
Госпрограммадин патахъай тамам делилар РД-дин экономикадин ва мулкар вилик тухунин министерстводин сайтдай жагъида.
«Лезги газет»
