И мукьвара Краснодардин крайдин общественный тешкилат тир (ККОО) Лезги медениятдин центради Кубанда (Новотитаровская станица, «Олимп» стадион), Шарвили эпосдиз талукьарна, спортдинни медениятдин сувар кьиле тухвана.
ИкI, хабар гузвайвал, и юкъуз футболдин турнирда 6 командади иштиракна: «Самур-Кубань», «Леки-Кубань», «Шагьдагъ», «Фий», Краснодардин крайдин адвокатрин палатади ва и крайда авай удинрин медениятдин центрадин командайри.
Абур чи уьлкведин жуьреба-жуьре халкьарин векилрикай ибарат тир. Россиядин футболдин «гъед» Максим Деменко «Фий» командадик кваз къугъвана. Краснодардин крайдин адвокатрин палатадин вири состав и юкъуз спортдин майдандал хьана.
«Олимп» спорткомплексдин кьиле авай ксари къейд авурвал, турнир хъсан тешкиллувал аваз ва къугъунарни къизгъиндаказ кьиле фена.
Спортдин маса жуьрейрай акъажунар ва медениятдин мярекат лагьайтIа, «У фермера» тIвар алай ял ядай базада (Нововеличковская станица) давам хъхьана. Ана Калмыкия Республикадин Яшалтинский райондин культурадин кIвалин директор Руслан Закиева тамамарай манийри, Россиядин виридалайни хъсан пагьливан Эдуард Мустафаева «Росэкстрим» ансамблдик кваз къалурай устадвили вири гьейранарна. Равиль Набиеван регьбервилик кваз гиряйрин спортдай кьиле тухвай акъажунарни гзаф итижлубур хьана.
Чуьлдал, михьи гьавадал, кIарасрин цIал гьазурнавай тIуьнри (аш, рганвай як, чранвай фу) кIватI хьанвайбурун иштагьар ачухна ва, кьилинди, садвили абурун рикIерик шадвал кутуна. Чи эпосдин игит Шарвили Ватан хуьзвайди, халкь агудзавайди тир. Идакай, гьакIни Кавказдин виридалайни кьиблепата яшамиш жезвай чи халкьдикай санлай, чи ата-бубайрин кьегьалвилерикай мярекатда чIехиди яз хкянавай Ярагьмед Алаудиновича вичин рахунра гьам лезги, гьамни урус чIаларалди лагьана. Къенин юкъузни чи кьегьалри Украинада фашизмдихъ галаз кьиле тухузвай военный махсус серенжемдин тереф хуьзвайди къалурна.
Гьазурайди — Р.Рамалданова
