Дербентдин 12-нумрадин юкьван мектебда ингилис  чIалан тарсар гузвай жегьил муаллим Аида  Кьасумова шегьердин образованидин хиле лайихлувилер къалурзавай, йисал-суз аялриз мягькем чирвилер гузвай пешекаррин жергедик акатзава.

Шад жедай кар ам я хьи, Аида Шакировнади шегьердин ва республикадин конкурсрани активвилелди иштиракзава, агалкьунарни къазанмишзава.

“Россиядин сагъламвилин муаллим 2018” (Учитель здоровья России – 2018”)  лишандик кваз и мукьвара Томск шегьерда кьиле фейи Вирироссиядин конкурсдани Аида Кьасумова “Гъалиб хьунин къаст хьунай” номинациядай гъалиб хьана.

И конкурсда Россиядин Федерациядин субъектрай тир 44 муаллимди иштиракна. Конкурс 2010-йисалай гатIунна, РФ-дин  Государственный Думадин образованидинни илимдин рекьяй Комитетди ва уьлкведин просвещенидин министерстводи  санал кьиле тухузва.

Аида Кьасумова Вирироссиядин конкурсда чи республикадин патай иштиракай тек са  кас я. Ада вичин гъалибвилелди вири Дагъустан машгьурна.

Нариман Къарибов