Хъсан хьанва
Чи хуьруьн рекьер пара пис гьалдиз атанвай. ЦIинин йисан гатфарилай башламишна, Къурушдал къвезвай рехъ Текийрин хуьрелай винидихъ ремонт ийизва. Пара чIуру гьалда авай Текийрин хуьруьн кьилихъ галай ЧIулав къванер ва ЧIулав шимин кIам участокрал ацалтзавай рехъ: машинар пара четинвилелди гьализ жезвайди тир икьван чIавалди. Усугъчайдилай, ремонт ийидалди, машин 2-2,5 сятда хквезвайтIа, гила хуьруьз кьван са сятни жезвач, гьакьван хъсан хьанва. Халкьди сагърай лугьузва рекьерал зегьмет чIугвазвайбуруз, кьиле Рамазанов Муьршуьд аваз. Аллагь куьмек хьурай чпиз виридаз!
ФАП эцигзава. Амма…
Чи хуьрени цIийи ФАП эцигиз гатIуннава. Анжах эцигзавай чкадиз фикир гун тавуна, чил чара авунва. ФАП эцигзавай чка, жемят кIватI жезвай ким яз, чи хуьруьнви Къулиев Шерифалиди, вичин чан алайбурулай садакьа, кьейибурун игьсан яз, кьуд пад кIевна, ракь яна, инсанар ацукьдай скамейкаяр эцигна, чилени бетон цана, къулайдаказ туькIуьрнавайди тир. Гила, ФАП багьна кьуна, чу-кIурна, кьуд пад ачух яз алама. ФАП эцигзавай чкадал экуьнахъ халкьди мал-хеб кIватIзавайди тир. Анин михьивал гьикI хуьдатIа, гьадакай садани фикирнач. Мягьтел жедай кар я: а гегьенш Къурушдал ФАП эцигдай са дуьзгуьн чка жагъанач.
Чка дуьзгуьнди туш
Республикадин МЧС-ди чи хуьре пожарный часть эцигиз гатIуннава. КIвалахар къизгъиндиз виликди физва. Алай вахтунда фундамент арадиз гъизва. И объектни важиблуди я, амма эцигзавай чка дуьзгуьнди хкянавач. Ина кьейибуруз, пIирериз, шейхериз, незир алай бубайриз къуллугъ авуна кIанзавайди я. Амма, вучиз ятIани, чи хуьруьн кьилевайбуру, садални алукь тавуна, и объект сурарин винел эцигиз тазва. Гьажи Зенги пIирни гьа чкадин вилик ква. И карди чи рикIер тIарзава.
Ш.Багъиров
