Са тIимил вахт идалай вилик Кеферпатан Осетия — Аланиядин Моздок шегьерда футболдай аялрин арада гьар йисуз кьиле тухузвай нубатдин “Къизилдин зулун” пишкешар патал турнир акьалтIна.
Ана Кеферпатан федеральный округдин жуьреба-жуьре регионрай, гьа гьисабдай яз, Дагъустан, Кабардино-Балкария, Кеферпатан Осетия — Алания республикайрай, Ставрополдин ва Краснодардин крайрай жаван футболистри чпин устадвал къалурна. Гьар йисуз и турнирда Дербентдин 1-нумрадин ДЮСШ-дин футболистрини (“ТЕФИ” тIвар алай команда яз) иштиракун хъсан адетдиз элкъвенва. Къейд авун лазим я хьи, командади гьар йисуз приздин чкаярни кьазва. ИкI, нубатдин сеферда Дербентдин “ТЕФИ” команда 2-чкадиз лайихлу хьана.
Финалдин акъажунра къадим шегьердай тир жаван футболистар турнирдин тешкилатчи — Моздок шегьердин ДЮСШ-дин футболистрихъ галаз “гуьруьшмиш хьана”. Кьве падни мягькем акъвазнавай, къугъун лап къизгъиндаказ кьиле физвай. Кьилин вахтунда командайрин къугъун 1:1 гьисабдалди акьалтIна. Судьяйри пенальтийрин нетижада гъалибчи команда тайирунин къарар кьабулна. ИкI, 4:3 гьисабдалди чкадин командадин футболистри гъалибвал къазанмишна. Винидихъ хабар ганвайвал, “ТЕФИ” команда гимишдин медалдиз лайихлу хьана.
Шадвалдай кар мадни ам я хьи, турнирда виридалайни хъсан къугъвайди яз (2007-йисуз дидедиз хьанвай жаванрин арада) “ТЕФИ” командадин капитан Мегьамед ва Амир Эмиргьамзаев турнирдин виридалайни хъсан защитник яз хкяна. Абурув ва гъилибвал къазанмишай командайрин амай футболистривни шад гьалара кубокар, медалар, грамотаяр ва къиметлу пишкешар вахкана.
Дербентдин футболдал рикI алай ксари жаван футболистриз ва 1-нумрадин ДЮСШ-да абуруз вердишвилер гузвай тренер Ибрагьим Султановаз “Къизилдин зул” турнирда нубатдин агалкьун рикIин сидкьидай тебрикзава.
Алай четин вахтунда аялриз республикадилай къецез фидай мумкинвал гайи — пулдин такьатар чара авур ксариз: “ТЕФИ” тIвар алай коммерциядин фирмадин регьберар тир Тельман Гьамзаеваз, Физули Сагуеваз, гьакIни аялар и турнирдиз хъсан гьазур хьун патал еке чалишмишвилер авунай Дербентдин 1-нумрадин ДЮСШ-дин директор Нежеф Эмирбеговаз футболистри ва абурун диде-бубайри сагърай лугьузва.
Мадина Аршинова
