Куь ихтиярар
Гьукуматди гзаф аялар авай хизанриз ийизвай куьмекрикай сад ипотекадихъ галаз алакъалу я. Пуд ва адалай гзаф аялар авай хизанри ипотекадай кIвалер маса къачурла, 450 агъзур манатдин кьадарда аваз пулдин бурж гьукуматди вахкузва.
Месела, кьве аял авай хизан кьан. Вад йис идалай вилик хизанди ипотекадин куьмекдалди кIвал маса къачуна. Сифтегьан гьакъидин еринда дидевилин капиталдин такьатар гана. 2020-йисуз абуруз пуд лагьай аял хьана. И вахтунда хизан банкуниз 700 агъзур манат буржлу яз амай. Адакай 450 агъзур манат гьукуматди вахкуда. Амукьзавай 250 агъзур манат хизанди вахкун лазим жеда.
Асул истемишунар ихьтинбур я
Гьукуматдин куьмек 2019-2022-йисара пуд лагьай (ва я адалайни артух) аял пайда хьанвай хизандиз (дидедиз, бубадиз) талукь я. Гьукуматдин куьмек къачузвай диде ва я буба РФ-дин ватандаш хьун кьилин шартI я. Гьукуматди гузвай пулдин куьмек ватандашдин яшдилай, адаз къвезвай къазанжидилай аслу туш.
Эгер хизанди ипотекадин кредит 2010 ва я 2015-йисуз къачунватIа, гьа буржни гьукуматдин куьмекдалди вахкуз (450 агъзур манат) жеда.
И делилар чаз РД-дин кьилин МФЦ-дин идаради раижна.
«Лезги газет»
