И йикъара Мегьарамдхуьруьн райондин кьил Фарид Агьмедова мини-футболдай райондин турнирда гъалиб хьайи командайрив шабагьар вахкуниз талукьарнавай шад мярекат кьиле тухвана. Идакай “Лезги газетдиз” райондин администрациядин пресс-къуллугъди хабар гана.
Ватандин ЧIехи дяведа гъалибвал къазанмишна 75 йис тамам хьуниз, РикIел хуьнин ва Баркаллувилин йисаз талукьарнавай спортдин и серенжемда райондин хуьрерин хкянавай 12 командади иштиракна. Ам тешкилнавайди райондин администрациядин физический культурадин ва спортдин отдел тир…
Къейд авун лазим я хьи, МР-дин кьил Ф.Агьмедован къарардалди “Демография” милли проектдин сергьятра аваз алай вахтунда районда кьве проект — “Физический культура ва спорт вилик тухун” ва “Общественный сагъламвал мягькемарун” кьилиз акъудзава.
— Чи везифа агьалийрин жезмай кьван гзаф кьадар спортдал желб авун ва сагълам уьмуьр кьиле тухунин жигьетдай таблигъат тухун я, — къейдзава райондин кьили.
Турнирдин нетижаяр агъадихъ галайбур хьана: 1-чка Кчун-Къазмайрин командади кьуна. 2 ва 3-чкайриз, талукь тирвал, Гъепцегьрин ва Ярагъ-Къазмайрин командаяр лайихлу хьана. Шад мярекат санитариядинни эпидемиологиядин вири къайдайрал амал авуналди кьиле тухвана. Гъалиб хьайи командайриз дипломар, медалар ва къиметлу пишкешар гана.
Чи мухбир
