Зул акъатна. Гьаваяр къанва, хъуьтIуьнбуруз  ухшар хьанва. Гару тарарилай, ван ацалтна, хъипи, яру  пешер кIвадарзава. Гзаф тарар кьецIил хьанва. Амма абурун арайрай къизилдин ранг алай, гзаф гуьрчег, хъипи емишар аквазва — хурмаяр. Вердиш хьанва  абур чи ерийривни.

Са 8-10 йис вилик чна абур, Дербентдин базардилай маса къачуна,  аялриз ва я кефсузбуруз гузвайтIа, гила Куьре патан багъларани булдиз битмиш жезва. Хурмадин таз, я тар авачир  сал, багъ, белки, авач жеди. Абур алай тарариз килигдай кьве вил кIанда, гьакьван гуьрчег я.

Чи багълара авай тарарин арада хурмадинбурни  хьун шадвалдай кар я. Герек кьадар жуваз туна, артуханбур чкадал ва я патал тухуз масани гузва.

Гьаваяр рекъидалди, жив къвадалди, абур гъилихъди авурла, регьят жеда. ГьикI лагьайтIа, аязди абур чIулаварда, акунар, дад амукьдач, гадаруниз мажбур жеда.

РикIел алама, 2011-йисан ноябрдин сифте кьилера са йифиз хьайи аяздикди тарарал алай хурмаяр вири къаю чIулаварнай, къванер хьтинбур хьанай. Вядеда абурун къайгъу авун чарасуз я. Хурмаяр эцигай чкадални хъсандиз чрада, верцIи дад жеда абурухъ. Нез кIан жедай емиш я.

Эхиримжи вахтара инсанриз абур, чIукварна, кьуруриз, компотарни гьазуриз чир хьанва. Хурмадин кьурай патар ичин, чуьхверинбурулайни ерилу, дадлу жезва. Имни хурма хийирлудаказ ишлемишдай цIийи са къайда я.

Четин жезвайди абур атIудайла я. Гъили ялна, атIуз лап четин жеда. МукIратI, я  тахьайтIа, секатор ишлемишна кIанда. Емишар цуьрцерал гзаф тIарамдиз алкIанваз жеда, гьасятда хадай абурулай атIун четин я.

Исятда къелемар акIурдай вахт алукьнава. Сала, багъда хурмадин къелемар  авачирбуру абур, маса гузвай чкайрай гъиз, цазва. И гуьрчег, менфятлу, къизилдин ранг алай емишар къуй виридан багълара битмиш ва бул хьурай!

Райсудин Набиев