Мукьвара Калукрин хуьруьн клубда жемятдин мавлид кьиле фена. Ана РД-дин Диндин  управленидин векилар тир алимри, Кьиблепатан Дагъустандин районринни хуьрерин имамри ва масабуру иштиракна. Мярекат мавлидар ва нашидар кIелунин рекьяй машгьур устад Заур гьажи Салягьова ачухна ва кьиле тухвана.

Ада калуквийриз ва мугьманриз Рабиуль-аввалдин варз ва мавлид мубаракна. Ада къейд авурвал, Аллагь-Таалади лагьана: “Эгер За Мугьаммад (с.а.с) пайгъамбар халкьдачиртIа, и дуьньяни халкьдачир. За дуьньядал халкьнавай кьван пайгъамбаррилай (с.а.с.) Мугьаммад (с.а.с.) пайгъамбар истеклу ва багьа я”. РД-дин Муфтиятдин просвещенидин отделдин Ахцегь районда авай векил Сулейман гьажи Байрамова лагьайвал, эгер са касди гьар юкъуз Пайгъамбардиз талукьарна (с.а.с.) 1000 салават кIелайтIа, адав женнетдин муштулух агакьда.

Межлисдал Сулейман — Стальский райондин имамрин Советдин председатель, “Ас-салам” газетдин редактор Гьасан гьажи Амаханов, Дербент райондин имам Къурбан гьажи Рамазанов, “Калукрин хуьр” СП-дин кьил Жафер Жалилов, жегьил шаир Владик Батманов, Хуьруьгрин хуьруьн имам Юзбег гьажи Сулейманов, Мегьарамдхуьруьн райондин имам Агьмад гьажи Мегьамедов, Калукрин хуьруьн жуьмя мискIиндин имам Салягь гьажи Салягьовни рахана.

Эхирдай хуьр аваданламишунин рекье чпин пулдин такьатар серфзавай ва общественный уьмуьрда активнидаказ иштиракзавай калуквияр тир карчи Абдуселим Абдуселимоваз, хуьруьн администрациядин кьил Жафер Жалиловаз, Ахцегьрин пожарный частунин начальник Ариф Дустоваз, пенсионерар тир Сефибег Ражабоваз, Мавлудин Шихрагьимоваз, Садикь Салягьоваз, Назидин Шаидоваз, Алаверди Алавердиеваз Заур гьажи Салягьован патай диндин гьадисар авай ктабар багъишна.

Ахпа мавлиддин иштиракчияр нисинин капI авун патал мискIиндиз фена. Идалай гуьгъуьниз и чкадал жемятдиз тIуьн-хъун гана. Мавлид куьтягь хьайила, гьар садав, садакьа яз, ширинлухар авай пакетар вахкана. Къуй вирибурун садакьаяр, мавлидар  Аллагьди кьабулрай!

Рагьидин Эминов