И йикъара чун Кьасумхуьруьн 2-нумрадин юкьван школадин директор, Дагъустан Республикадин лайихлу муаллим Мамед Велибегович Велиевахъ галаз гуьруьшмиш хьана, адахъ галаз эхиримжи йисара школадихъ кIелунин, тербиядин, спортдин рекьерай жезвай агалкьунрикай ихтилатар авуна.
— Алай кIелунин йисуз чи школада 200-дав агакьна аялри кIелзава. Школадихъ хъсан нетижаяр, агалкьунар хьун — им, гьелбетда, сифте нубатда чи муаллимрин кIвалахдин нетижа я. Алай вахтунда школада 40 муаллимди жавабдарвилелди кIвалахзава, — лагьана директорди.
Бубайрихъ мисал ава: иридра ван къведалди, садра акун хъсан я. М.Велиева чаз тежрибалу муаллим Къизил Мегьамедовнади тухузвай химиядин тарсуниз теклифна. Сифте нубатда чна фикир гана хьи, класс-кабинетда михьи, экуь я, герек тадаракарни ава, цларикай таблицаяр, машгьур алимрин-химикрин шикиларни куьрсарнава. Къизил Мегьамедовнади гузвай суалризни школьникри дуьз ва тамам жавабар вахкузва. Тарсунин вахтунда аквазва хьи, муаллимдинни аялрин арада авай алакъа сихди, ихтибарлуди я, аялрин рикI муаллимдал, муаллимдин рикI аялрал ала.
— Къизил Мегьамедовна гьа вичин тIварцIиз килигай къизил хьтин михьи инсан, муаллимни я, — давамарзава М.Велиева. — Гьавиляй адаз чи школадин муаллимрин дуствилин коллективда, школьникрин, абурун диде-бубайрин патайни еке гьуьрмет ава.
Малум хьайивал, ада 1975-1980-йисара Даггосуниверситетда кIелна. Ингье, 38 йис я ада Кьасумхуьруьн 2-нумрадин юкьван школада химиядин тарсар гузва. Гьа сифте йикъарилай Къ.Лукьмановади вич хъсан чирвилер авай, тешкилатчивилин кIвалах алакьдай, аялрал рикI алай муаллим яз къалурна. Вичин предметни муаллимдиз хъсандиз чида, гьавиляй адалай дерин и чирвилер, химиядин “сирер” аялрал агакьариз алакьни ийизва. Къизил Мегьамедовнадин ученикри гьар йисуз республикадин ва райондин школьникрин олимпиадайра приздин чкаяр кьазва, ЕГЭ-дайни еке баллар къачузва.
Къизил Мегьамедовнади чирвилер ва тербия гайи гзафбурукай тIвар-ван авай пешекарар хьанва — Грозныйда духтур-хирург яз кIвалахзавай медицинадин къуллугъдин подполковник Эльдар Зильфикъаров, Москвада духтур яз кIвалахзавай Маил Бабаев, Сулейман-Стальский райондин больницадин духтур Саида Бабаева, “Лезги газетдин” редакциядин отделдин редактор Рагнеда Рамалданова, гьа и школада муаллимар яз кIвалахзавай Индира Гьажимурадова (биолог), Гуьлуьшан Ибрагьимова (химик-биолог), Оксана Гьажибегова (математик), сифтегьан классрин муаллим Суьльгьия Рамазанова ва масабур.
Къизил Лукьмановадин яргъал йисарин дурумлу ва намуслу зегьмет РФ-дин Президентдин грант (2006-йис), “РФ-дин образованидин гьуьрметлу работник” лагьай тIвар, райондин образованидин управленидин гьуьрметдин грамотаяр гуналди къейднава, ам зегьметдин ветеран я.
— Жува тарс гайи гадайрикайни рушарикай хъсан пешекарар, халис инсанар, ватанпересар хкатун — им зун патал виридалайни чIехи награда я, — лугьузва милайим Къизил муаллимди.
Асият Мирзалиева,
Хазран Кьасумов
