Донбассда военный махсус серенжем тухуниз мажбур хьана ингье йисни жезва. Неинки дяведин гьерекатар кьиле физвай майданра, гьакI сиясатдин къурулушрани кьиле физвай женгер лап къизгъинбур я. Соледар шегьер гъиляй акъатай миллетбазри неинки Донецкдин, Луганскдин, Запорожьедин, Херсондин, гьакI Белгороддин ва маса областрин ислягь шегьерриз, хуьрериз НАТО-дин яракьрай гуьлле гузва, ракетайрай язава. Украина гъалиб хьана кIанзавай США-дин ва РагъакIидай патан уьлквейрин ампайрин ягьсузвилихъ кьадар амач. США-ди неинки Германиядивай, Франциядивай, Англиядивай, гьакI Кьибледин Кореядивай ва маса уьлквейривайни миллетбазриз алай аямдин яракьар, танкар, ПВО-дин къурулушар рекье тун истемишзава. Крым Украинадик кухтун патал США-ди вири жуьредин такьатар ва яракьар ишлемишда лугьузва. Чпин алчах планар кьилиз акъуддай рекьери веревирд ийиз, душманар Германияда авай Америкадин Рамштайн авиабазада кIватI хьана. Германияди Украинадиз «Леопард» танкар рекье твазвач лугьуз, Зеленский къапарай акъатзава. ЦРУ-дин кьил Уильям Бернс чинеба Киевдиз фена ва ада гуя Зеленскийдиз мукьвал вахтара Россияди ийидай военный гьерекатрикай суьгьбетналда. Джордж Бушан (гъвечIидан) институтдин крар идара ийидай директор Дэвид Крамера Крым ва гьакI маса мулкарни Украинадив вахкуни США-дин итижриз жаваб гузвалда.
Гьа са вахтунда Россиядин Яракьлу Къуватрин кьушунри, душманрин лагълагъриз килиг тавуна, уьлкведин Президентди вилик эцигнавай везифаяр тамамарзава. Запорожьедин Орехово шегьердин къваларив гьужумдиз физва. Артемовскдин (Бахмут) кьиблепата авай Клещеевка хуьр азаднава ва женгер шегьердин къваларив кьиле физва. Къе-пака амни азадда. Дагъустандин кьегьалрини шегьерар, хуьрер фашистрикай азад авунин карда викIегьвилелди иштиракзава. ИкI, артиллерист Казим Назирбегова махсус серенжемда гьа сифтедилай иштиракзава. Октябрдин вацра младший сержантдиз тади гьалда юлдашрив герек яракьар агакьарунин тапшуругъ гана. Душмандин гуьллейрик акатна, яракьар авай автомашин къайдадикай хкатна. Назирбегова чIур хьанвай чкаяр са куьруь вахтунда туькIуьр хъувуна ва юлдашрив яракьар агакьарна. Ида чи аскерриз, артиллеристриз душмандин 40 бронетехикадикай ибарат колонна тергдай мумкинвал гана. Гьужумдиз физ кIанзавай душманни кьулухъ чIугуниз мажбурна. Махсус тапшуругъ кьилиз акъуддайла, викIегьвал къалурунай Казим Назирбеговаз Суворован медаль гана.
Нубатдин хуьр азад авун патал гьужумдиз физвай старший лейтенант Рашидхан Амирасланован взвод ВСУ-дин терефдихъай язавай гуьллейрин хурук акатна. Рашидхана гьасятда чеб алай чка чир тежедайвал авуна ва къулай чка жагъурна, душманди цIай гузвай чкаяр чирна, командованидиз хабар гана. Са акьван вахт алатнач, миллетбазрив дуьзгуьн жаваб агакьна. Минометчикрин батарея ва 20 фашист къирмишна.
Жергедин аскер Камил Гьасанова гьужумдиз физвай чи частарин далу пад мягькемарзавай дестедик кваз вичин везифаяр тамамарзавай. Россиядин подразделенияр далу патан куьмекдикай магьрум авунин мураддалди душманди Камил авай далу патан колоннадал чинеба гьужумна. Патав хьиз хъиткьинай тупунин гуьлледи машиндиз зиян гана ва ам акъвазна. ЦIу кьунвай машиндай экъечIна, Камила, лишандик кутаз, кьуд боевик тергна. Мумкинвал хьанмазди, ада машин туькIуьр хъувуна ва чи частари вич гуьзетзавай райондиз гьална.
Танкар ва бронетехника ремонтдай подразделенидин командир, сержант Шамил Гъафурован халис пешекарвал ва уьтквемвал себеб яз, гуьнгуьнай акъатнавай вишелай виниз женгинин техникадал чан хкана. Ида чи частарин женгинин мумкинвилер артухарзава. Махсус серенжемдив эгечIай сифте йикъалай Шамил, техника тади гьалда ремонтдай гьалар арадал атайла, женгер кьиле физвай районриз физва. Вичин чандиз хасаратвал хьуникай къурху авачиз, танкарин чIур хьайи частар, агрегатар дегишзава. Адаз танкистрини, бронетехникадин водителрини сагърай лугьузва. Гьа са вахтунда сержант Гъафурова цIудалай виниз жегьил аскеррикайни техника ремонтдай хъсан пешекарар гьазурна.
Капитан Тимур Темирбегова душмандин гуьллейрин харцик са шумуд суткада артиллериядин подразделенидиз вилик эцигнавай тапшуругъ кьилиз акъудиз, регьбервал гана. Адан батареяди миллетбазрин артиллериядин залан “Акация” тупарин кьве взвод, къецепатан уьлквейрай ганвай мад кьве туп ва минометрин пуд секция барбатIна, 50 нацист къирмишна. Ихьтин игит рухвайриз баркалла!
Махсус серенжемда сифтедилай къагьриманвилелди иштиракзавай “Вагнер” дестедин регьберди хабар гайивал, Донецк республикадин Артемовск шегьердин къваларив кьиле физвай женгера хейлин неонацистар, радикалар къирмишна. Абурун арада Украинадин миллетбазрин терефдарар яз яракь гъиле кьунвай “Гуржистандин легион” дестедин 20-далай виниз боевикар тергна. Телеф хьайибурун арада миллетбазрин “Азов” батальондик экечIнавай шведар, англичанарни авай. Къейд ийин хьи, гуржийрин боевикар лап инсафсуз краралди тафаватлу жезва. Абуру хер, контузия хьана гъиле гьатай чи аскерар рекьизва, абуруз зулумар ийизва. Гуржи боевикрин са пай Лисичанск шегьер азад ийидайла къирмиш авурди тир.
Абад Азадов
