Алайди хъуьтIуьн вахт я. Бязибуруз акI я хьи, хъуьтIуьн варцар хуьруьн майишатдин карханайриз, лежбервилинни фермервилин майишатриз, арендаторриз производстводин хилера кIвалах авачир вахт я. Эминхуьряй тир уьзуьмчи-арендатор Гьажимет Аллагьвердиев икI фикирзавайбурухъ галаз эсиллагь рази туш.
— АкI фикирзавайбур аватIа, им лап ягъалмишвал я, — лугьузва Гь.Аллагьвердиева. — Акси яз, хъуьтIуьн варцара уьзуьмчивилин, багъманчивилин ва маса хилера гзаф кIвалах ава. Мадни, зулухъай кIватI хъийидай бегьердин гьам кьадар, гьамни ери къенин йикъара чуьлда тухузвай кIвалахдилай гзаф аслу я.
Тежрибалу уьзуьмчидихъ агъан тийидай себебар чахъ авач. Гьажимет саки 30 йисуз “Аламишинский” совхозда уьзуьмчивилин бригададин бригадирвиле ва кьилин агрономвиле кIвалахай Алимет Аллагьвердиеван гада я. Уьзуьмлухрихъ гелкъуьнин, анра агротехникадин гьар са серенжем вичин вахтунда ва еридивди кьиле тухунин, ципицIрин бул бегьерар вахчунин сирерни Гьажимета вичин дахдивай чирна.
“Перестройкадин” ялав галукьна, совхозар чкIайла, зегьмет, кIвалах галачиз вичин уьмуьр гьич фикирдизни гъиз тежедай Алимет Аллагьвердиева 3 гектар уьзуьмлухар арендада кьуна, ципицIар гьасилна. Вичин яшар хьайила, и участок Алимета гададив вугана. Гьажимета вичини гуьгъуьнлай 5 гектарда уьзуьмлухар кутун хъувуна.
Чаз акурвал, Гь.Аллагьвердиеван кIвачихъ галай уьзуьмлухар чешнелу гьалда ава. Чаз ана хайи даяхар, кьатI хьанвай сим акунач. Жергейрин араяр цанва, уьзуьмлухриз хъуьтIуьн ятар ганва.
И йикъара Гьажимет уьзуьмлухра тегьенгрин кьурай ва герек авачир хилер атIунал машгъул я. 5 гектарда и кар кьиле тухванва. И ва маса серенжемар кьиле тухудайла, дах Алиметни адан куьмекчи, кIва-лахдин юлдаш, меслятчи я.
Гь.Аллагьвердиева чаз лагьайвал, арендадин участокда асул гьисабдай “реслинг” сортунин ципицIрин тегьенгар ава. И сортуни чкадин шартIара хъсан бегьер гузва. И кар Гьажимета гьар йисуз вичин кIвачихъ галай уьзуьмлухрин гьар са гектардай 100-130 центнер ципицIар кIватI хъувуналди субутзава. 2021-йисуз гектардин бегьерлувал саки 250 центнер хьана. Гь.Аллагьвердиевахъ “Беларус” маркадин трактор, адахъ акалдай хуьруьн майишатдин вири алатарни ава. Ида арендатордиз уьзуьмлухра агротехникадин серенжемар вичин къуватралди тамамардай мумкинвал гузва.
— Райондин агропромышленный комплексдин хиле алай вахтунда 960 кас арендаторри зегьмет чIугвазва, — лагьана чаз хуьруьн майишатдин ва суьрсетдин управленидин начальникдин заместитель Гьамидин Абдулкъафарова. — Чилин къадир авай, чпин гьакъисагъ зегьметдалди халкьдин суфра берекатлу ийизвай арендаторрик Гьажимет стхани ква. Чухсагъул ва аферин ихьтин инсанриз.
Гьажимет Аллагьвердиевахъ алай йисуз вичин кIвачихъ галай уьзуьмлухрин гьар са гектардай 150 центнердилай тIимил тушиз ципицIар кIватI хъийидай къаст ава. Ваз къуватар хьурай, арендатор Гьажимет!
Хазран Кьасумов
