Квевай кIеве гьатай касдиз куьмек гуз жедани? Сулейман-Стальский райондин КIварчагъ дередин хуьрерин СОШ-ра кIелзавай аялривай, за фикирзавайвал, гила куьмек гуз алакьда. Имни и йикъара “Хатасузвилин дере — 2020” лишандик кваз КIварчагъа кьиле тухвай спортдинни тренировкайрин акъажунрин нетижа я лагьайтIа, ягъалмишвал авач.
И серенжем кьиле тухуник кьил кутурди “Кьиблепатан Дагъустандин жегьилрин Союз” ДРОО-дин регьбер, кIварчагъви Равидин Абдурагьимов я. ИкI, КIварчагъа, Гьабиб Аллагьвердиеван тIварунихъ галай боксдин спорткомплексдин гьаятда, кьиле фейи акъажунра КIварчагъай, Зизикай, НуьцIуьгъай тир 3 командади рагарай (скалодромдай) хкаж хьунай, чуьлдин лагерь туькIуьрунай ва кьетIен гьалара медицинадин куьмек гунай чпин устадвал ва алакьунар къалурна. Спортдин мярекатдиз тамашиз дередин хуьрерин агьалиярни атанвай.
Малум хьайивал, командайрин арада 1-чкадиз КIварчагърин СОШ лайихлу хьана. 2 ва 3-чкаяр, талукь тирвал, НуьцIуьгърин ва Зизикрин школайрин аялрин командайри кьуна.
Акъажунра иштиракай вири аялриз кубокар, медалар ва къиметлу пишкешар гана.
Кьиблепатан Дагъустандин жегьилрин Союзди спортдин и мярекат кьиле тухун патал пулдин такьатар чара авунай ФЛНКА-дин кьиле авай ксариз, гьакIни Сулейман-Стальский райондин администрациядиз ва Дербент шегьердин кьилин заместитель Шамил Алиеваз акъажунар тешкилиз куьмек гунай сагърай лугьузва.
«Лезги газет»
