(Эвел — 34-35, 37-38-нумрайра)
Гьакимвал (пачагьвал) ийидайла, адалатлувал хуьнихъ зурба нетижаяр ава: “Садра… румвийрин пачагьди Умар халифадин (Аллагь рази хьурай вичелай) патав вичин векил ракъурна. Мединадив агакьайла, ада пачагь Умар (Аллагь рази хьурай вичелай) гьина аватIа хабар кьуна. Мединада авайбуру лагьана: “Чахъ пачагь авач, чахъ эмир (халифа) я авайди ва ам Мединадай экъечIнава”. Векил адахъ къекъвез гатIунна ва эхирни адаз ам, вичин гъилевай лашни кьилик кутуна (тарцин кIаник), къумадал ксанваз акуна. И кардал атанвайди гзаф мягьтел хьана ва ада лагьана: “И итим аку, вири пачагьар адан гьайбат акваз, игьтиятлу я. Амма и кас и гьалда ава (секиндаказ ксанва). Я Умар, вуна адалатлувал ийизва, гьавиляй вун ксанва. Чи пачагьри лагьайтIа, зулум ийизва ва гьавиляй, са шакни авач, абур, ахвар квахьна, кичIела ава”.
Мусурман касдиз вичин вири крара уртабабвал (юкьван гьал) хуьн герек я. Уртабабвал къайгъусузвилин ва кьадарсуз кьетIивилин юкь я, кьве къерехни, чпин нубатда, айиб алай крар я. Уртабабвал ибадатра кьадарсуз кьетIивал тавун ва гьакIни къайгъусузвална тун тавун я. Нафакьайра (харжийра) ам — исраф (герек кьадардилай артух серф авун) ва мискьивал тавун я. Кьуръанда лагьанва: (25-сура, 67-аят, мана): “Ва чпи (чпин мал-девлет) харж ийидайла, я сергьятдилай элячI тийиз (артух гзаф серф тийиз), я “чуькьвена кьун” (мискьивал) тийиз (чпин харж авунар), а кьве гьалдин арада аваз ийизвайбур (уртабаб яз)!”
(КьатI ама)
Ямин Мегьамедов,
диндин рекьяй алим
