Вахтар физва. 1941-1945-йисарин дяведин шагьидар хьайи яшлу инсанар къвердавай тIимил жезва. Советрин Союздин девирдин вахтунда халкьдин арада авай гьуьрмет, хатур, тербияламишунин къайдаяр гила рикIел хтайла, вилерал накъвар къвезва. Дяведин йисара, зи рикIел алама, жува ва масабуру галатун кваз такьаз кIвалахнай. Аялри шаддиз никIерай кьилер кIватIдай. Яшлу итимриз, папариз куьмекар гудай, няни хьайила, сад-садан кIвалериз хуьруьк фидай, махар ахъайдай, яшлу инсанриз гьуьрметдай.
Гьа йисарин четинвилериз дурум гайибурукай сад аялзамаз бубадикай магьрум хьайи рабочий, муаллим, Сулейман-Стальский райондин Уллугъетягърин хуьряй тир Исабегов Насредин я. Ам муаллим Гьамзатан хизанда дидедиз хьана. Адан дидени муаллим тир, Телли дидеди Гьамзатаз са хвани кьве руш багъишна.
Насредина Уллугъетягърин, Кьасумхуьруьн ва Шихидхуьруьн школайра кIелна. Дяведин йисара ада хуьруьн аялрихъ галаз санал колхоздин кIвалахар тамамарна.
Школада хъсан чирвилер къачур алакьунар авай гада анин директор рагьметлу Юсуфов Керима старший пионервожатыйвиле эцигна. 1954-йисуз Насредин армиядин жергейриз фена. Украинадин Бердычево шегьерда танкарин частуна къуллугъна. Адаз сержантвилин чин гана, взводдин командирдин заместителвиле тайинарна.
1956-йисан 15-октябрдиз Венгрияда къалар акъатайла, часть гьаниз рекье туна. Ана хьайи ягъунра взводдин командир телеф хьана. Адан чкадал танкарин взводдин командирвиле младший лейтенантвилин чин ганвай Насредин Исабегов тайинарна. 1958-йисуз хъсан пешекар, санал къуллугъзавай аскеррин арада гьуьрмет къазанмишнавай Насрединаз лейтенантвилин чин гана.
Венгриядай хкведалди вилик вичин буржи уьтквемвилелди кьилиз акъудай лейтенант Яру Гъетрен орден гун патал лайихлуди яз къалурнай.
Армиядай хтайла, жегьил Туркменистандин Челекен шегьердиз нафтIадин мяденра кIвалахиз фена, адал буругъриз алатар тухудай залан трактор тапшурмишна. 1959-йисуз ам хайи хуьруьз хтана, Дагъустандин университетдин тарихдинни филологиядин факультетдик экечIна. 1964-йисуз вуз хъсан къиметар аваз куьтягьай гада Уллугъетягърин юкьван школадиз хтана.
1974-йисалай 1982-йисалди ада школадин директорвиле кIвалахна. 1982-йисуз советдин секретардин везифаяр тамамарна.
Насредин Гьамзатовичал хуьруьнвийри са шумуд къуллугъ (гьинаг зайиф ятIа) ихтибарна, ада намуслувилелди кIвалахна. 1985-йисуз ам хуьруьн “Айдинбековский” совхоздин парткомдин секретарвиле хкяна. Гуьгъуьнлай, совхозар чкIайла, мад школадиз муаллимвиле хъфена.
Девришбегова Пчеханахъ галаз санал Насредина 4 хвани 1 руш кIвачел акьулдна. Хва Исабегов Радика Николаев шегьерда илимрин академиядин тежриба тухудай заводдин генеральный директор, Навруза манидар-музыкант, руш Валидади медработник яз кIвалахна. Виридаз чпин хизанар ава.
Насрединан 84 йис хьанва. Идакай 47 йисуз зегьмет чIугуна. Къе районда кьиле физвай хъсан дегишвилерал ада разивалзава.
Насредин Исабеговаз хуьре еке гьуьрмет ава, адан гаф ише физва, жегьилри адаз яб гузва. Агъсакъалрин ва общественный палатадин член тир ада хуьре кьиле физвай общественный мярекатра иштиракзава, акьалтзавай несилдиз дуьз рекьер къалурзава.
Вадим Жамалдинов
