2023-йисуз Дагъустанда етим аялриз яшайишдин кIвалер маса къачун патал 779,1 миллион манат пул чара ийида. Идакай ислен юкъуз РД-дин Кьил Сергей Меликован регьбервилик кваз кьиле фейи совещанидал республикадин эцигунрин, архитектурадин ва ЖКХ-дин министр Артур Сулейманова хабар гана.
Министрдин гафаралди, и такьатрихъ 350 аялдиз кIвалер маса къачуз жеда. И месэладин гьакъиндай муниципалитетрихъ галаз кутIуннавай икьраррални къулар чIугунва.
Артур Сулейманова рикIел хкайвал, республикада 23 йис хьанвай етимриз яшайишдин рекьяй алава куьмекар гун патал кьилдин къанун кьабулнава. Адан бинедаллаз етимриз яшайишдин кIвалер маса къачун патал пулунин сертификатар чара ийиз жезва. И кардин менфятлувал адакай ибарат я хьи, сертификат гъиле гьатайла, гьар садаз чпиз хуш чкадай кIвал маса къачудай мумкинвал жезва.
Агьмед Магьмудов
