Алай йисан 2-мартдиз Дагъустандин Кьил Владимир Васильев ЦIумада райондин цIай кьунин нетижада 17 кIвал канвай (11 кIвал — михьиз, 6 кIвалин — паяр) Тисси-Ахитли хуьруьз фена. ЦIай кьур кIвалера яшамиш жезвай инсанар, гьа гьисабдай яз 7 аялни, тади гьалда анай акъудна. Кьейибур ва хасаратвилер хьайибур авач. Виликамаз авай делилралди, цIай кьунин кьилин себеб гурмагъдай цIун цIелхем кьуранвай векьерал аватун яз гьисабзава.
В.Васильев ва адахъ галай жавабдар ксар бедбахтвал хьайи агьалийрихъ галаз гуьруьшмиш хьана, абуруз куьмек гуникай, цIай кьунин нетижаяр арадай акъудуникай рахана. Республикадин Кьили кIеве гьатнавай ксарив куьмек агакьдайди къейдна.
-Куьмек гун давам жеда. И кардал чна спонсорарни желбда. Кьилинди, бедбахтвал кьилел атанвай гьар са касдал, гьар са хизандал куьмек агакьун я, — лагьана ада. В.Васильева жавабдар къуллугърал чIуру нетижаяр арадай акъудунин серенжемар кьубулун тапшурмишна, гьар са кIвализ фена, гьар са касдивай хабарар кьуналди, бедбахтвал арадал атунин себебрай кьил акъудуниз эвер гана.
Россиядин МЧС-дин РД-да авай Кьилин управленидин начальник Нариман Къазимегьамедован гафаралди, Тисси-Ахитли хуьруьн кIвалери цIай кьуникди эменни михьиз кайи агьалийриз — 100 агъзур, эменнидин са пай кайибуруз 50 агъзур манатдин кьадарда аваз куьмек гуда. Закондал асаслу яз, цIай кьуникди зарар хьайи ксарив са сеферда гудай пулдин куьмекни агакьда. Идалайни гъейри, цIийи кIвалер эцигун ва зиян хьанвайбур туьхкIуьрун патал республикадин бюджетдай 11 миллион манат чара ийида.
Тисси-Ахитли хуьруьн бедбахтвал кьилел атай агьалийриз куьмек гун яз, Чечнядин кьил Рамзан Къадирова Ахмат Къадирован тIварунихъ галай фондунай 10 миллион манат чара авунин къарар кьабулнава.
Россиядин Президент Владимир Путина Тисси-Ахитли хуьре арадал атанвай гьалдай кьил акъудунин ва агьалийриз алакьдай вири куьмекар гунин тапшуругъ гана. Идакай Россиядин МЧС-дин кьилин заместитель Андрей Гуровича республикадин исполнительный властдин органрин оперативный совещанидал хабар гана.
Алай вахтунда бедбахтвилик акатай ксар яшамиш жедай чкайралди ва чими тIуьналди таъмин я. Чкадал МЧС-дин ва маса къуллугърин векилри кIвалахзава. Республикадин резервдай агьалийриз куьмек рекье тунва.
4-мартдиз кIвалер кайи 10 агьалидив цIийи паспортар вахкана. ЦIумада райондин кьилин заместитель Мегьамед Исаева мукьвал вахтара амай документарни агьалийрив агакьдайдахъ инанмишарна.
РикIел хкин: 1-мартдин йифиз хуьре са кIвали цIай кьуна. Гуьгъуьнлай цIай 17 кIвалив агакьна. Йифен сятдин 2 тамам жез 25 декьикьа амаз цIай хкадариз алакьна. И карда 70 пожарныйди, гьакI хуьруьнвийрини иштиракна. Кьабулай серенжемрин нетижада 73 кIвал куникай хуьз алакьна. Дагълух и хуьре вири 300 кIвал ава.
Гьазурайди — Рагнеда Рамалданова
