5-мартдиз тухвай нубатдин совещанидал Дагъустандин Кьил Владимир Васильева бюджетдин доходриз талукь пай ахцIурунин важиблувал ва пассажирар тухунин карда къайда тунин чарасузвал къейдна. Идан гьакъиндай РД-дин Кьилин ва Гьукуматдин Администрациядин пресс-къуллугъди хабар гузва.
Совещанидиз атанвай республикадин законар акъуддай, исполнительный ва муниципальный властдин органрин руководителрихъ элкъвена, Владимир Васильева лагьана: “Чна вирида вири крарин патахъай жаваб гузвайди я. Заз чна вуч ийизватIа ва вуж патал ийизватIа, гьа кар куьне аннамишна кIанзава. РД-дин МВД-ди, депутатри, Гьукуматдин талукь тир министерствойри санал кIвалах тухунин нетижада чалай са куьчеда — Махачкъаладин Акушинскийдин тIварунихъ галай проспектда — авай къурулушрилай 100 миллион манатдин кьадарда аваз налогар кIватIиз алакьна. Виликдай икьван такьатар агакьзавайди тушир”. Идахъ галаз сад хьиз, республикадин регьберди къейд авурвал, алай вахтунда къуватда авай къанунрал амал тавуна кIвалахзавай ксар уголовный жавабдарвилиз чIугвазва.
Рахунар давамаруналди, В.Васильев улакьра аваз пассажирар тухунин месэладал акъвазна. Гьа и вахтунда ада тайинарнавай къайдаяр чIуруниз рехъ гуз тежедайди къейдна: “Чеб ишлемишнавай вахт фикирда кьун тавуна, чпин технический гьал, водителрин сагъламвилин гьал ахтармиш тавуна, “Газелра” аваз пассажирар тухуз жеда лугьуз, инсанар алдатмишун виже къведай кар яни мегер? Тайинарнавай къайдайрал амал тавуна кIвалахунай ахьтин водителар жавабдарвилиз чIугвазвач. Чна и карда къайда твада”.
Региондин руководителди тайинарнавай къайдайрал амал тавуна пассажирар тухунай законодательствода жавабдарвилиз чIугун къалурнавайди рикIел хкана. “Гьелелиг чна рахунар кьиле тухузва, амма чун пассажирар тухунин карда, гьар гьикI авуртIани къайда туниз мажбур жеда, гьикI лагьайтIа, инсанар улакьра аваз лазим тир хатасузвал таъминарзавай шартIара фин герек я. Пассажирар тухунин гьакъиндай кутIунзавай икьрарда абур тухузвай ксарин хиве жавабдарвал гьатзавайди къалурна кIанда. Инсандиз хасаратвал гайи дуьшуьшда адав эвездин пулар агакьарун лазим я. И кIвалах адалатлудаказ кьиле тухун герек я”, — инанмишвал къалурна Владимир Васильева.
Пассажирар тухунин кIвалах маса хилерихъ, гьа гьисабдай туризмдихъ галаз алакъалу авуналди, Дагъустандин Кьили асул везифа маршрутдин таксийрикай менфят къачузвай агьалийриз къулай шартIар таъминаруникай ибарат тирди къейдна.
«Лезги газет»
