Апрелдин сифте кьилера Махачкъаладинни Антальядин (Туьркия) арада авиаалакъа кардик кухтада, — хабар гана 5-мартдиз ТАСС-диз Махачкъаладин аэропортунин генеральный директордин куьмекчи Камила Гьамзатовади.
“7-апрелдиз авиарейсини Махачкъалани Анталья алакъалу ийида. Гьафтеда кьве сеферда рейсер Туьркиядин Azur Air авиакомпанияди тамамарда”, — лагьана К.Гьамзатовади. Адан гафаралди, Махачкъаладай Антальядиз самолетар хемис ва гьяд йикъара рекье гьатда.
21-февралдилай Atlasglodal авиакомпанияди Махачкъаладинни Стамбулдин арада авиаалакъа кардик кухтуна, самолетри рейсер гьафтеда кьведра тамамарзава.
Махачкъаладин аэропорт Дагъустандихъ авай сад я. 2014-йисуз самолетар цавуз хкаж жедай ва ацукьдай зул цIийикIа туькIуьр хъувурдалай гуьгъуьниз и аэропортуни вичин кIвалахдин делилар йисалай-суз хъсанарзава. Вичин тарихда сифте яз ада 2018-йисуз рекорддин кьадар пассажирриз — 1,29 миллион касдиз къуллугъна.
«Лезги газет»
