Гьакъикъат я, эцигунар патал тайинарнавай чилин хсуси участок авай гьар са касди, дарамат эцигунин кIвалахар квелай ва гьикI башламишдатIа лугьуз, фикирар ийида.
Гьи месэладиз фикир гун лазим я сифте нубатда? Пешекарри тестикьарзавайвал, бинеяр эгъуьнуникайни, кIвалин винел патан акунрикайни, пландикайни ваъ, эвелни-эвел эцигунар кьиле тухунин гьакъиндай ихтиярар ава лагьай махсус документ туькIуьруникай фикир авун герек я. Эцигунрин ихтиярар гузвай документ гьам кIвалеризни, гьам инсанар яшамиш тежедай дараматризни (месела, алишвериш патал) талукь я.
Гьатта ихтиярар ганва лагьай документ туькIуьрдалди дарамат эцигнаватIани, объект къанундалди тестикьарун ва хсусиятчидин ихтиярар хуьн патал акт гьазурун чарасуз я.
Пешекарри къейдзавайвал, ихтиярар гузвай чарар-цIарар галачизни эцигунар кьиле тухуз жеда, амма ихьтин дуьшуьшда объект жуван хсусият я лагьана регистрация авун ва инженерный сетрик кутун четин акъвазда. Гьавиляй эцигунрихъ, архитектурадихъ, коммунальный сетрихъ галаз алакъалу РФ-дин талукь къанунрал амал авуниз сифте нубатда фикир гун герек я. И жигьетдай галай-галайвал малуматар, лазим документар чирун патал гьар са агьалидиз МФЦ-дин идарадин къуллугърикай менфят къачудай мумкинвал ава. Чпихъ чилин участокар авай эцигунарзавай вирибурувай ихтиярар гузвай документ МФЦ-дин идарайрай къачуз жеда.
«Лезги газет»
