18-августдиз Белиждин гимназиядин актовый залда поселокдин полициядин пунктунин УУП-ди (участковый уполномоченный полиции) халкьдин вилик 2017-йисан 6 вацран гьахъ-гьисаб авуна.

Мярекатда Россиядин МВД-дин Дербент райондин отделдин начальник Мирбуба Сеидова, Россиядин МВД-дин Дербент райондин отделдин УУП-дин отделдин начальник Арсен Арабханова, Белиж поселокдин полициядин пунктунин начальник Сейран Гьуьсейнова, Белиж поселокдин кьил Рамиз Гьабибулаева, обшественный тешкилатрин векилри, муаллимри ва поселокдин жемятди иштиракна.

Мирбуба Сеидова вичиз полицейский участковыйрин кIвалахдин жигьетдай халкьдихъ гьихьтин фикирар аватIа чир хьана кIанзавайди къейдна.

Мярекатдин сергьятра аваз полициядин майор  Арсен Арабханова авур докладдай малум хьайивал, 2017-йисан ругуд ­вацра Белиж поселокдин сергьятда яшамиш жезвай агьалийрилай 312 административный  протокол кхьенва. Абурун арадай яз гъвечlи хулиганвал авунай — 44, кефли яз общественный чкай­риз экъечlнавайбурулай — 42, общественный чкайра хъивегьунарзавайбурулай — 57, ПДД-дин къайдаяр  чlурайбурулай — 43 ва  административный жермеяр тагайбурулай — 11 протокол кхьенва.

Тахсиркарвилерин вилик пад кьунин важиблу рекъем участковыйри административный закон чlурзавайбуруз рехъ тагун ва абур дуьздал акъудун я. Профилактикадин учетда авайбурукай рахайтlа, абурун кьадар 110 кас я. Абурукай ругуд кас шартlунал­ди кар атlанвайбур, 4- шартlуналди ахъайнавайбур, 11 — наркотик­рихъ галаз алакъа авайбур, 12 — ичкидин таъсирдик кефсузбур, 3 — административный гуьзчивилик квайбур, 46 — кас сифте яз судди кар атlанвайбур ва  4 касни  хизанра къалзавайбур я.

2017-йисан гьахъ-гьисабдин вахтунда поселокда 7 тахсиркарвал авуна. Абурукай ругуд дуьздал акъуднава, муькуьди авунвайбурун гуьгъуьна къекъвезва.

Ара датIана профилактикадин серенжемар кьабулуни ва гъил-гъиле аваз гъвечlи тахсиркарвилер дуьздал акъудуни гележегда гражданри чlехи тахсиркарвилер авунин вилик пад кьадай мумкинвал гузва.

2017-йисан сифтедилай башламишна  Белижда 65 касди адетдинди  тушир исламдин рехъ кьунва,  абурукай 21 кас дишегьлияр я. Белижвийрикай 8 касди Сирияда Россияда къадагъа авунвай ИГИЛ-дин гьерекатра иштиракзава.

— Къенин йикъан важиблу месэлайрикай сад, терроризмдиз кьил ягъиз кlанзавайбур виликамаз кьатlана, абуруз и кар авуниз рехъ тагуникай ибарат я. Икl, чна фад таъсирдик акатзавайбурухъ, чпин фикирар дигмиш тахьанвайбурухъ ва гьакlни чи учетда­ авайбурухъ галаз кlвалах тухузва. Диндин экстремизмдин месэ­лайриз талукь яз чун поселокдин общественностдихъ ва активдихъ галаз гуьруьшмиш хьана. Чи территорияда гьалар  секин я ва адетдинди тушир диндин терефдарри агитация тухузвай дуьшуьшар гьелелиг авач, — малумарна А.Арабханова.

Ахпа ам тахсиркарвилер арадал къвезвай себебрал акъваз­на: яшамиш жезвай чкайра жаванрихъни аялрихъ галаз тер­биядин кlвалах зайифарун, датlана халкьдин арада гзаф чкlизвай пиянискавални наркомания, теле ва киноэкранрилай зулумкарвал, чалкечирвал ва маса нагьакьан крар пропаганда авун.

Тахсиркарвилер арадал атунин месэлаяр фикирда кьуна, об­щественный чкайра ва куьчейра кlвалах тухузвай талукь планрик­  дегишвилер кухтуна. Гзаф криминогенный гьалар авай общест­венный чкайра ППСП-дин нарядар кардик кутунва. Инра маса серенжемарни тухузва.

Анал гьакlни участковыяр тир полициядин капитанар Бахтияр Агъаева ва Жабир Шихагьмедова гьахъ-гьисаб авуна, гьакI поселокдин агьалияр тир Абдулгьамид Ражабов, Саижат Гьабибова ва масабур рахана.

Мярекатдин эхирдай Мирбуба Сеидова ва Арсен Арабханова­ чпиз гьамиша активдаказ куьмек гузвай поселокдин кьил Ра­миз­ Гьабибулаеваз ва поселокдин жемятдиз гзаф сагърай лагьана.

Полициядин участковыйрин кlвалахдиз жемятди санлай рази жедай къимет гана.

Къагьриман Ибрагьимов