Муниципалитетдин сайтди хабар гайивал, Мегьарамдхуьруьн районда Россиядин Федерациядин Государстводин пайдахдин йикъаз талукьарнавай мярекатар кьиле фена.
Райондин культурадин отделдик акатзавай централизованный библиотекайрин къурулушдин (ЦБС) коллективди “Россиядин пайдах халкьдин дамах я” тIвар алай ватанпересвилин сят тешкилнавай. И мярекатда райондин яшлу несилдин векилри ва жегьилри хушвилелди иштиракна.
Россиядин пайдахдин тарихдикай суьгьбет авурдалай гуьгъуьниз кIватI хьанвайбурун арада Россиядин государстводин яржар чир хьуниз талукьарнавай итижлу конкурс кьиле тухвана.
ЦБС-дин 19-нумрадин филиалда библиотекадиз атайбуру сада-садаз чпиз государстводин пайдахдин тарихдикай чизвай делилар ахъайна.
5-нумрадин филиалда “Россиядин руьгь адан яржара ава” тIвар алаз ктабрин выставка ачухнавай.
РФ-дин Государстводин пайдахдин йикъан сергьятра аваз школайрин къваларив ачухнавай гатун лагерра акьалтзавай несил ватанпересвилин руьгьдал алаз тербияламишунин, уьлкве ва государстводин важиблу яржар, тарих кIан хьунин гьиссер кутунин мураддалди жуьреба-жуьре серенжемар тешкилнавай.
Райондин культурадин управленидин жегьилрин отделди ва волонтеррин штабди санал районда “Триколор” акцияни кьиле тухвана. И карда гзаф жегьилри, школьникри иштиракна. Абур Мегьарамдхуьруьн кьилин куьчейра къекъвена. Волонтерри агьалийриз гъвечIи пайдахар гана, РФ-дин Государстводин пайдахдин югъ тирдакай хабар авани, пайдахдин рангарин мана вуч я ва алай аямдин пайдах мус арадал гъайиди я, лугьудай суалар гана. Къейд ийин хьи, хабар кьур гзафбуруз уьлкведин ва государстводин пайдахдин тарихдикай хейлин делилар чизвай.
Мегьарамдхуьруьн райондин администрациядин пресс-къуллугъ
